អ្នកវិភាគព្រមានថា ការលួចឆ្លងដែនទៅធ្វើការនៅថៃ ដោយខុសច្បាប់ ប្រឈមគ្រោះថ្នាក់ដល់ជីវិត និងការកេងប្រវ័ញ្ចកម្លាំងពលកម្ម
ភ្នំពេញ ៖ អ្នកវិភាគនៅកម្ពុជាបានអំពាវនាវដល់ប្រជាពលរដ្ឋ និងពលករខ្មែរសូមពិចារណាឱ្យបានហ្មត់ចត់ មុនសម្រេចចិត្តលួចឆ្លងដែនទៅធ្វើការនៅប្រទេសថៃដោយខុសច្បាប់ ព្រោះនេះជាការប្រថុយប្រថានខ្ពស់ ដែលអាចនាំឱ្យពលករប្រឈមគ្រោះថ្នាក់ដល់អាយុជីវិត ការរើសអើង ការចាញ់បោកមេខ្យល់ និងការកេងប្រវ័ញ្ចកម្លាំងពលកម្ម។
លោកបណ្ឌិត យង់ ពៅ អ្នកជំនាញវិទ្យាសាស្ត្រនយោបាយ នៃរាជបណ្ឌិត្យសភាកម្ពុជា បានលើកឡើងថា ការឆ្លងដែនដោយខុសច្បាប់ទៅប្រទេសថៃ គឺជាការប្រថុយប្រថានខ្ពស់បំផុត ព្រោះអាចប្រឈមនឹងការចាប់ខ្លួន ការធ្វើទុកបុកម្និញ និងគ្រោះថ្នាក់ដល់អាយុជីវិត ក្នុងអំឡុងពេលឆ្លងដែនដោយខុសច្បាប់។
លោកថ្លែងថា៖«ការឆ្លងដែនទៅធ្វើការនៅប្រទេសថៃដោយខុសច្បាប់មានការប្រថុយប្រថានច្រើនណាស់ ទី១ គឺប្រថុយប្រថាននឹងអាយុជីវិតខ្លួនឯងតែម្តង គឺអាចប្រឈមនឹងត្រូវក្រុមទាហានថៃ ឬក្រុមអាជ្ញាធរថៃវាយប្រហារ ឬបាញ់ប្រហារ ដោយសារថៃមិនបានឱ្យតម្លៃទៅដល់ជនជាតិយើងទេ»។
លោកបណ្ឌិតបានបញ្ជាក់ថា ក្រៅពីហានិភ័យផ្នែកសុវត្ថិភាព ពលករដែលទៅធ្វើការដោយខុសច្បាប់ក៏អាចរងនូវការរើសអើង ការកេងប្រវ័ញ្ចកម្លាំងពលកម្ម ការមិនទទួលបានប្រាក់ឈ្នួលតាមការសន្យា និងការបោកប្រាស់ពីសំណាក់មេខ្យល់ ឬនិយោជកផងដែរ។
ស្របគ្នានេះ លោកបណ្ឌិត គិន ភា ប្រធានវិទ្យាស្ថានទំនាក់ទំនងអន្តរជាតិ នៃរាជបណ្ឌិត្យសភាកម្ពុជា បានព្រមានថា ពលករដែលលួចឆ្លងដែនទៅធ្វើការនៅថៃដោយខុសច្បាប់ អាចប្រឈមនឹងត្រូវចាប់ខ្លួន ការធ្វើទុកបុកម្និញ ការកេងប្រវ័ញ្ចកម្លាំងពលកម្ម និងការមិនទទួលបានប្រាក់ឈ្នួល បន្ទាប់ពីខិតខំធ្វើការអស់រយៈពេលយូរ។
លោកថ្លែងថា៖«សូមឱ្យបងប្អូនពលករខ្មែរដែលនៅតែចចេស ទទួចលួចឆ្លងដែនដោយខុសច្បាប់ទៅកាន់ប្រទេសថៃ ដើម្បីរកការងារធ្វើសូមឱ្យបងប្អូនគិតឡើងវិញ ហើយខ្ញុំសូមបញ្ជាក់ថា ការងារក្នុងស្រុករបស់យើងក៏មានដែរ ដូច្នេះសូមឱ្យបងប្អូនស្វែងរកការងារនៅខ្មែរយើងធ្វើ ហើយក៏អាចទទួលការបណ្តុះបណ្តាលវិជ្ជាជីវៈដោយឥតគិតថ្លៃដែលរាជរដ្ឋាភិបាល តាមរយៈក្រសួងការងារ និងបណ្តុះបណ្តាលវិជ្ជាជីវៈលោកបានរៀបចំ»។
លោកបណ្ឌិតបានបន្ថែមថា ការរើសអើង ការប្រមាថ និងការបំពានលើសិទ្ធិមនុស្ស ក៏ជាបញ្ហាដែលពលករខុសច្បាប់អាចជួបប្រទះផងដែរ ជាពិសេស សកម្មភាពលួចឆ្លងដែនជាបន្តបន្ទាប់ អាចជះឥទ្ធិពលអវិជ្ជមានដល់កិត្តិយស និងមុខមាត់របស់ប្រទេសជាតិទាំងមូលទៀតផង។
អ្នកវិភាគទាំងពីរបានអំពាវនាវឱ្យបងប្អូនប្រជាពលរដ្ឋបោះបង់គំនិតលួចឆ្លងដែនដោយខុសច្បាប់ និងងាកមកស្វែងរកឱកាសការងារ ឬចូលរួមកម្មវិធីបណ្តុះបណ្តាលជំនាញវិជ្ជាជីវៈនៅក្នុងប្រទេស ដែលកំពុងត្រូវបានរាជរដ្ឋាភិបាល និងក្រសួងការងារ និងបណ្តុះបណ្តាលវិជ្ជាជីវៈជំរុញយ៉ាងសកម្ម ដើម្បីកសាងអនាគតប្រកបដោយសុវត្ថិភាព ស្ថិរភាព និងនិរន្តរភាព៕
