អ៊ីរ៉ាក់ បដិសេធផែនការចាកចេញ ពីអង្គការ OPEC ដោយសង្កត់ធ្ងន់ លើការវាយតម្លៃឡើងវិញ នូវកូតាផលិតកម្ម
បាកដាដ៖ ក្រសួងប្រេងអ៊ីរ៉ាក់ បានបដិសេធរបាយការណ៍ ប្រព័ន្ធផ្សព្វផ្សាយថា ប្រទេសនេះ កំពុងពិចារណាចាកចេញ ពីអង្គការប្រទេសនាំចេញប្រេង (OPEC) ដោយសង្កត់ធ្ងន់លើការវាយតម្លៃឡើងវិញ នូវកូតាផលិតកម្ម។
ក្រសួងបានឧ្យដឹង នៅក្នុងសេចក្តីថ្លែងការណ៍មួយថា ទាំងនាយករដ្ឋមន្ត្រីអ៊ីរ៉ាក់ និងរដ្ឋាភិបាល មិនបានលើកឡើង ពីបញ្ហានៃការដកខ្លួននោះទេ ដោយបន្ថែមថា អ៊ីរ៉ាក់ បានសង្កត់ធ្ងន់ ជាប់លាប់លើសារៈសំខាន់ នៃការវាយតម្លៃឡើងវិញ នូវកូតាផលិតកម្ម ដើម្បីឲ្យស្របនឹងសមត្ថភាពផលិតកម្មប្រកបដោយចីរភាពរបស់រដ្ឋជាសមាជិក ស្របតាមកិច្ចព្រមព្រៀង ដែលត្រូវបានអនុម័តដោយប្រទេសពាក់ព័ន្ធទាំងអស់ និងការយល់ដឹង ទាក់ទងនឹងស្ថានភាពសន្តិសុខ និងសេដ្ឋកិច្ចរបស់អ៊ីរ៉ាក់។
OPEC និងប្រទេសសម្ព័ន្ធមិត្តរបស់ខ្លួនបានឆ្លើយតបទៅនឹងវិធីសាស្រ្តនេះ ដោយចាប់ផ្តើមដំណើរការមួយ ដើម្បីវាយតម្លៃឡើងវិញនូវសមត្ថភាពផលិតកម្មប្រកបដោយចីរភាពអតិបរមារបស់ប្រទេសជាសមាជិក។
សេចក្តីថ្លែងការណ៍នេះបានកត់សម្គាល់ថា OPEC និងសម្ព័ន្ធមិត្តរបស់ខ្លួនបានចាប់ផ្តើមស្តារបរិមាណផលិតកម្ម ដែលបានកាត់បន្ថយបន្តិចម្តងៗ ហើយ ហើយការបន្តឡើងវិញទាំងស្រុង នៃការកាត់បន្ថយដោយ ស្ម័គ្រចិត្តទាំងអស់ត្រូវបានគ្រោង នឹងបញ្ចប់ ក្នុងរយៈពេលប៉ុន្មានខែខាងមុខនេះ ដែលនឹងរួមចំណែកដល់ ការពង្រឹងកូតាផលិតកម្មរបស់ប្រទេសអ៊ីរ៉ាក់។
យោងតាមក្រសួង ការទាមទារណា មួយទាក់ទងនឹងកូតាផលិតកម្ម ឬកម្រិតសមត្ថភាពនឹង ត្រូវបានដោះស្រាយ តាមរយៈយន្តការបច្ចេកទេស និងផ្អែកលើការឯកភាពគ្នា ដែលបានបង្កើតឡើងនៅក្នុងក្របខ័ណ្ឌរបស់ OPEC និងសម្ព័ន្ធមិត្តរបស់ខ្លួន។
នៅថ្ងៃព្រហស្បតិ៍ របាយការណ៍ព័ត៌មាន ដែលដកស្រង់ប្រភពអ៊ីរ៉ាក់ បានឧ្យដឹងថា ប្រសិនបើកូតាផលិតកម្ម របស់ប្រទេសអ៊ីរ៉ាក់ មិនកើនឡើងនោះទេ ហេីយប្រទេសនេះអាចនឹងដកខ្លួនចេញពីអង្គការ OPEC៕
ប្រែសម្រួល ឈូក បូរ៉ា
