អាមេរិក និងអ៊ីរ៉ង់ ប្រកាសផ្អាកការវាយប្រហារគ្នា ដើម្បីជួបគ្នានៅទីក្រុងដូហា លើបញ្ហាច្រកសមុទ្រហ័រមូស
វ៉ាស៊ីនតោន៖ សហរដ្ឋអាមេរិក និងអ៊ីរ៉ង់ បានព្រមព្រៀងគ្នាផ្អាកការវាយ ប្រហារគ្នាទៅវិញទៅមក “សម្រាប់ពេលនេះ” និងធ្វើកិច្ចចរចានៅថ្ងៃអង្គារ នៅទីក្រុងដូហា រដ្ឋធានីនៃប្រទេសកាតា ដើម្បីដោះស្រាយជម្លោះរបស់ពួកគេ លើច្រកសមុទ្រហ័រមូស។
មន្ត្រីអាមេរិកម្នាក់ត្រូវបានដកស្រង់សម្តីថា ភាគីទាំងពីរនឹងផ្អាកការវាយប្រហារគ្នា “សម្រាប់ពេលនេះ” ហើយ “នាវាអាចធ្វើដំណើរដោយសេរី” ខណៈដែលកិច្ចចរចាបច្ចេកទេសត្រូវបានកំណត់ឱ្យបន្ត។
កិច្ចចរចានៅថ្ងៃអង្គារ ដំបូងឡើយត្រូវបានកំណត់ឱ្យធ្វើឡើងនៅប្រទេសស្វីស និងផ្តោតលើកម្មវិធីនុយក្លេអ៊ែររបស់អ៊ីរ៉ង់។ ទោះជាយ៉ាងណាក៏ដោយ ភាពតានតឹងឡើងវិញ នៅក្នុងច្រកសមុទ្រហ័រមូស បានជំរុញឱ្យកិច្ចចរចា ត្រូវបានផ្លាស់ប្តូរទៅទីក្រុងដូហា ដោយផ្លាស់ប្តូរការផ្តោត អារម្មណ៍ទៅលើសន្តិសុខ ដឹកជញ្ជូននៅក្នុងផ្លូវទឹកយុទ្ធសាស្ត្រ។
ក្នុងអំឡុងពេលចរចានៅប្រទេសស្វីស កាលពីមួយសប្តាហ៍មុន គណៈប្រតិភូសហរដ្ឋអាមេរិក បានយល់ព្រមជាមួយអ៊ីរ៉ង់ ដើម្បីបង្កើត “ខ្សែទូរស័ព្ទទាន់ហេតុការណ៍” រវាងយោធាសហរដ្ឋអាមេរិក និងកងឆ្មាំបដិវត្តន៍អ៊ីស្លាមអ៊ីរ៉ង់ ដើម្បីសម្របសម្រួលចរាចរណ៍នៅក្នុងច្រកសមុទ្រហ័រមូស។
ទោះជាយ៉ាងណាក៏ដោយ គិតត្រឹមថ្ងៃសៅរ៍សប្ដាហ៍មុន “ខ្សែទូរស័ព្ទទាន់ ហេតុការណ៍” នៅតែមិនទាន់ដំណើរ ការនៅឡើយទេ នេះបើយោងតាមរបាយការណ៍។
សហរដ្ឋអាមេរិក បានធ្វើការវាយប្រហារ លើគោលដៅអ៊ីរ៉ង់ នៅថ្ងៃសុក្រ និងថ្ងៃសៅរ៍ ដោយលើកឡើងពី “ការឈ្លានពានរបស់អ៊ីរ៉ង់ ជាបន្តបន្ទាប់ប្រឆាំងនឹងការដឹកជញ្ជូនពាណិជ្ជកម្ម” នៅក្នុងច្រកសមុទ្រហ័រមូស ក្នុងនោះអ៊ីរ៉ង់ក៏បានឆ្លើយតប ដោយការវាយប្រហារ ទីតាំងយោធាអាមេរិក នៅក្នុងតំបន់ផងដែរ៕
ប្រែសម្រួល ឈូក បូរ៉ា
