ភ្នំពេញ៖ មជ្ឃដ្ឋានមួយចំនួន នៅខេត្តស្វាយរៀង ផ្ទុះការរិះគន់ តាមរយៈបណ្តាញ facebook រឿងគុណភាពទឹកស្អាតល្អក់ ដូចទឹកនោមគោ ហើយក៏មានបែកសារសម្លេង ពីលោកអនុប្រធាន អង្គភាពរដ្ឋាករទឹកខេត្តស្វាយរៀង បានព្រលះលោក អ៊ឹម មេសា ប្រធានអង្គភាពរដ្ឋាករទឹក ដែលអសមត្ថភាព ក្នុងការដឹកនាំអង្គភាព។
មន្រ្តីអង្គភាពរដ្ឋាករទឹកខេត្តស្វាយរៀង បានឲ្យដឹងថា គុណភាពទឹកស្អាតនៅ ខេត្តស្វាយរៀង ដែលមានសភាពល្អក់ និងមានក្លិនមិនល្អ កន្លងមក បណ្តាលមកពីកំហុស របស់លោក អ៊ឹម មេសា ប្រធានអង្គភាពនេះ ដែលបើកប្រាក់ពីអង្គភាពហើយ មិនបានយកប្រាក់នោះ ទៅទិញសម្ភារបច្ចេកទេស ដើម្បីផលិតទឹកស្អាតទេ បែរជាយកប្រាក់នោះ បម្រើផលប្រយោជន៍ ផ្ទាល់ខ្លួនទៅវិញ។
មជ្ឈមណ្ឌលព័ត៌មានដើមអម្ពិល បានទទួលសារជាសម្លេងកិច្ចប្រជុំ ពីបញ្ហាប្រឈមក្នុង អង្គភាពរដ្ឋាករទឹកខេត្តស្វាយរៀង នៅមន្ទីរសិប្បកម្ម វិទ្យាសាស្រ្ត បច្ចេកវិទ្យា និងនវានុវត្តន៍ខេត្តស្វាយរៀង ដែលដឹកនាំកិច្ចប្រជុំ ដោយលោក ឡុង សុខុម ប្រធានមន្ទីរនេះ ផងដែរ។ យោងតាមខ្លឹមសារ នៃកិច្ចប្រជុំនោះ បានរកឃើញមូលហេតុ ដែលបណ្តាលឲ្យគុណភាពទឹកអន់ និងមានក្លិនមិនល្អនោះ ជាកំហុសរបស់លោក អ៊ឹម មេសា ប្រធានអង្គភាពទឹកស្អាតនេះទាំងស្រុង។
មិនតែប៉ុណ្ណោះចាប់តាំងពី លោកអ៊ឹម មេសា ឡើងកាន់តំណែង ជាប្រធានអង្គភាពរដ្ឋាករទឹក ដែលមានការជួយជ្រាមជ្រែង ពីលោកឡុង សុខុម ជាប្រធានមន្ទីរសិប្បកម្ម វិទ្យាសាស្រ្ត បច្ចេកវិទ្យា និងនវានុវត្តន៍ ខេត្តស្វាយរៀងរួចមកនោះ ធ្វើឲ្យមានការរិះគន់ ពីពលរដ្ឋនៅខេត្តស្វាយរៀង យ៉ាងច្រើនរឿងគុណភាពទឹកខ្សោយ ទឹកល្អក់ ធុំក្លិនមិនល្អ ជាពិសេសតម្លៃទឹកស្អាត គឺថ្លៃជាងបណ្តាខេត្តផ្សេងៗផងដែរ មិនដឹងថា លោកអ៊ឹម មេសា មានសមត្ថភាពកម្រិតណានោះទេ បានជាគុណភាពទឹកអន់ម្ល៉េះ។
ពលរដ្ឋបានស្នើ លោករដ្ឋក្រសួងសិប្បកម្ម វិទ្យាសាស្ត្រ បច្ចេកទេសនិងនវានុវត្តន៍ ជួយពិនិត្យលោកប្រធានមន្ទីរ និងប្រធានអង្គភាព រដ្ឋាករទឹកខេត្តស្វាយរៀងផង ពលរដ្ឋរិះគន់ខ្លាំងណាស់ ជុំវិញបញ្ហាទឹកស្អាត គ្មានគុណភាព ដែលនាំឲ្យប៉ះពាល់ ដល់សុខមាលភាពរបស់ពលរដ្ឋ។ ពាក់ពន្ធ័ទៅនឹងការរិះគន់ ពីប្រជាពលរដ្ឋ ក៏ដូចមន្ត្រីអង្គភាពរដ្ឋាករទឹកខេត្តនេះ មជ្ឈមណ្ឌលដើមអម្ពិល មិនអាចទំនាក់ទំនង ទៅលោកអ៊ឹម មេសា បានទេ នៅថ្ងៃទី១៣ ខែមិថុនា ឆ្នាំ២០២០នេះ។
ខាងក្រោមនេះ សូមស្តាប់សម្លេង លោកជុំ គឹមហេង អនុប្រធានអង្គភាពខេត្តស្វាយរៀង ព្រលះលោកអ៊ឹម មេសា នៅក្នុងកិច្ចប្រជុំ……
