ក្រសួងការងារ បានដោះស្រាយ ការទាមទារ របស់បងប្អូនកម្មកររោងចក្រ ខូហ្ស៊ី នីត ចប់សព្វគ្រប់ជាមួយការពេញចិត្ត ខណៈកម្មករ នឹងចូលធ្វើការវិញ នៅព្រឹកស្អែក
ភ្នំពេញ៖ ការទាមទាររបស់បងប្អូនកម្មករកម្មការិនីនៃរោងចក្រ ខូហ្ស៊ី នីត ឯ.ក ដែលមានទីតាំងស្ថិតនៅតាមបណ្តោយផ្លូវជាតិលេខ ៣ ភូមិអន្លង់រមៀតខាងលិច ឃុំអន្លង់រមៀត ស្រុកកណ្តាលស្ទឹង ខេត្តកណ្តាល ត្រូវបានដោះស្រាយចប់សព្វគ្រប់ ដោយកម្មករសប្បាយចិត្តជាមួយដំណោះស្រាយរបស់ក្រសួងការងារ នៅរសៀលថ្ងៃទី៨ ខែកក្កដា ឆ្នាំ២០២៦នេះ ខណៈកម្មករនិយោជិតនឹងចូលធ្វើការធម្មតាវិញនៅព្រឹកថ្ងៃទី៩ ខែកក្កដា ។ នេះបើតាម លោក ស៊ុន មេសា អ្នកនាំពាក្យនៃក្រសួងការងារ និងបណ្ដុះបណ្ដាលវិជ្ជាជីវៈ។
អ្នកនាំពាក្យរូបនេះបានអះអាងថា ៖ «ក្រោមការសម្របសម្រួលនិងយកចិត្តទុកដាក់ដោះស្រាយភ្លាមៗ ពីសំណាក់មន្ត្រីជំនាញ កង្វល់របស់បងប្អូនកម្មករ ត្រូវបានដោះស្រាយចប់សព្វគ្រប់ ហើយកម្មករនឹងវិលចូលបម្រើការងារវិញ ជាធម្មតានៅថ្ងៃទី៩ ខែកក្កដា ឆ្នាំ២០២៦នេះដោយឯកភាពគ្នា ចំនួន១៨ចំណុច ដែលបានជជែកគ្នា ហើយក៏បានសន្យាគោរពឱ្យបានម៉ត់ចត់ផងដែរ» ។
លោក ស៊ុនមេសា បានឱ្យដឹងទៀតថា ក្រោយការពិភាក្សា និងសម្របសម្រួលភាគីទាំងពីរបានឯកភាពគ្នាស្រុះស្រួលចំនួន ១៨ចំណុចក្នុងនោះមានជាអាទិ៍ ប្រធានផ្នែកត្រូវប្រើពាក្យសម្តី ឱ្យបានសមរម្យ, ក្រុមហ៊ុនឯកភាព បើកលុយថែមម៉ោងនៅថ្ងៃចុងសប្តាហ៍, ចំពោះកម្មករនិយោជិត ដែលមានផ្ទៃពោះ តម្រូវឱ្យចេញពីធ្វើការម៉ោង ១៥, ក្រុមហ៊ុននឹងមានគ្រូពេទ្យនៅប្រចាំការ ជាដើម។
គួរបញ្ជាក់ថា ក្រោយពីទទួលបានព័ត៌មាននេះភ្លាម លោក ទុយ ស៊ីផាន់ រដ្ឋលេខាធិការក្រសួងការងារ និងបណ្តុះបណ្តាលវិជ្ជាជីវៈ រួមជាមួយក្រុមអន្តរាគមន៍ ក្រសួង និងមន្ទីរការងារ សហការជាមួយអាជ្ញាធរមូលដ្ឋាន បានចុះទៅសម្របសម្រួល ដោះស្រាយករណីនេះដោយមានការចូលរួមពីតំណាងក្រសួងការងារ និងបណ្ដុះបណ្ដាលវិជ្ជាជីវៈ, តំណាងមន្ទីរការងារ និងបណ្ដុះបណ្ដាលវិជ្ជាជីវៈ ខេត្តកណ្តាល, តំណាងអាជ្ញាធរមូលដ្ឋាន, តំណាងរោងចក្រ និងតំណាងកម្មករនិយោជិតដើម្បីស្តាប់កង្វល់ និងបញ្ហានានារបស់បងប្អូនកម្មករ។
អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ អះអាងថា ការដោះស្រាយដ៏លឿនរហ័សនិងមានប្រសិទ្ធភាពរបស់ក្រសួងការងារ ចំពោះកម្មករកម្មការិនីយ៉ាងដូច្នេះ គឺជាកិច្ចការងារអាទិភាពរបស់ក្រសួងក្នុងការយកចិត្តទុកដាក់ចំពោះបងប្អូនកម្មករនិយោជិត៕
