មេដឹកនាំកំពូលអ៊ីរ៉ង់ ៖ ការរំលោភលេី MOU ស្តីពីសន្តិភាពបង្ហាញថា ហត្ថលេខារបស់លោក ត្រាំ គ្មានតម្លៃ
តេអេរ៉ង់៖ មេដឹកនាំកំពូលអ៊ីរ៉ង់ លោក Mojtaba Khamenei បានឧ្យដឹងថា ការរំលោភលើអនុស្សរណៈនៃការយោគយល់គ្នាស្តីពីសន្តិភាព (MoU) ដែលទើបចុះហត្ថលេខាថ្មីៗនេះជាមួយអ៊ីរ៉ង់ បានបង្ហាញជាថ្មីម្តងទៀតថា ហត្ថលេខារបស់ប្រធានាធិបតីអាមេរិក លោក ដូណាល់ ត្រាំ គឺគ្មានតម្លៃ និងគ្មានសុពលភាព។
លោកបានធ្វើការកត់សម្គាល់នេះ នៅក្នុងសារមួយទៅកាន់ប្រជាជនអ៊ីរ៉ង់ ដែលផ្សព្វផ្សាយដោយប្រព័ន្ធផ្សព្វផ្សាយអ៊ីរ៉ង់ ដែលក្នុងនោះលោកបានលើកយកបញ្ហាសំខាន់ៗ របស់ប្រទេសមកពិភាក្សា។
លោក Khamenei បានលេីកឡេីងថា ការរំលោភលើអនុស្សរណៈនៃការយោគយល់គ្នាជាញឹកញាប់របស់សហរដ្ឋអាមេរិក ដែលត្រូវបានចុះហត្ថលេខាដោយប្រធានាធិបតីអ៊ីរ៉ង់ លោក Masoud Pezeshkian និងលោក ដូណាល់ ត្រាំ កាលពីថ្ងៃទី១៨ ខែមិថុនា “បានបង្ហាញជាថ្មីម្តងទៀតដល់មនុស្សគ្រប់គ្នាអំពីការពិតដែលថា ហត្ថលេខារបស់ប្រធានាធិបតីអាមេរិក គឺគ្មានតម្លៃ និងគ្មានសុពលភាព”។
លោកបានបន្ដថា សហរដ្ឋអាមេរិក «បានបង្ហាញមុខមាត់ពិតរបស់ខ្លួនជាថ្មីម្តងទៀតហើយ» ដោយកត់សម្គាល់ថា «បទពិសោធន៍ដ៏ខ្មៅងងឹតនៃឧក្រិដ្ឋកម្ម និងការរំលោភលើការសន្យានេះ គឺជាភស្តុតាងរឹងមាំមួយទៀតនៃការកុហករបស់សហរដ្ឋអាមេរិក និងធម្មជាតិមិនសមហេតុផល មិនគួរឲ្យទុកចិត្ត និងអាក្រក់របស់ខ្លួន»។
លោក Khamenei បានព្រមានថា ប្រសិនបើសហរដ្ឋអាមេរិក បន្តអ្វីដែលលោកពិពណ៌នាថា ជាការញុះញង់ឲ្យមានសង្គ្រាម ហើយស្វែងរកការដាក់ការចំណាយកាន់តែច្រើន អាមេរិកគួរតែរំពឹងថា នឹងមាន «មេរៀនដែលមិនអាចបំភ្លេចបាន» ពីអ៊ីរ៉ង់ និងរណសិរ្សតស៊ូ៕
ប្រែសម្រួល ឈូក បូរ៉ា
