មេដឹកនាំអាហ្វ្រិកខាងត្បូង ប្តេជ្ញាចិត្តជាមួយ នឹងទឹកប្រាក់រាប់ពាន់លានដុល្លារ ក្នុងការប្រយុទ្ធប្រឆាំង វិបត្តិធនធានទឹក
បរទេស ៖ យោងតាមការចេញផ្សាយរបស់ RT ប្រធានាធិបតីលោក Cyril Ramaphosa បាននិយាយថា អាហ្រ្វិកខាងត្បូង
នឹងចំណាយ១៥៦ពាន់លាន rand ឬប្រហែលជា៩,៥ ពាន់លានដុល្លារ លើហេដ្ឋារចនាសម្ព័ន្ធទឹក និងអនាម័យក្នុងរយៈពេល៣ឆ្នាំខាងមុខ ខណៈដែលរដ្ឋាភិបាល ស្វែងរកការដោះស្រាយការ ខ្វះខាតជាបន្តបន្ទាប់ និងសេវាដែលកាន់តែយ៉ាប់យ៉ឺន។
សេចក្តីប្រកាសនេះកើតឡើង ចំពេលមានការខកចិត្ត កាន់តែខ្លាំងឡើងពីគ្រួសារ និងអាជីវកម្មដែលរងផលប៉ះពាល់ដោយកង្វះទឹក ជាប់លាប់ ហេដ្ឋារចនាសម្ព័ន្ធ កាន់តែយ៉ាប់យ៉ឺន និងការផ្តល់សេវាក្រុងមិនល្អនៅទូទាំងផ្នែកជាច្រើននៃប្រទេស។
លោកRamaphosa បាននិយាយនៅក្នុងព្រឹត្តិប័ត្រព័ត៌មាន ប្រចាំសប្តាហ៍របស់គាត់កាល ពីថ្ងៃចន្ទថាក្នុងរយៈពេល៣ឆ្នាំខាងមុខ រដ្ឋាភិបាលបានបែងចែក១៥៦ ពាន់លានrandដល់ហេដ្ឋារចនាសម្ព័ន្ធទឹក និងអនាម័យ ដែលជាផ្នែកមួយ នៃកម្មវិធីវិនិយោគហេដ្ឋា
រចនាសម្ព័ន្ធសាធារណៈដ៏ទូលំទូលាយរបស់ខ្លួន។
ធាតុផ្សំសំខាន់នៃផែនការ គឺកម្មវិធីពន្លឿនការចូលប្រើប្រាស់ទឹកជាតិ ដែលទើបដាក់ឱ្យដំណើរការថ្មី ដែលនឹងផ្តោតលើការផ្តល់ទឹក តាមរយៈគ្រោងការណ៍ផ្គត់ផ្គង់វិមជ្ឈការ ដូចជាអណ្តូង គម្រោងអភិវឌ្ឍន៍ទឹកក្រោមដី និងប្រព័ន្ធប្រមូលទឹកភ្លៀង។
កម្មវិធីនេះត្រូវបានដាក់ឱ្យដំណើរការជាផ្លូវការ នៅ Hammanskraalរដ្ឋ Gauteng ដែលជាសហគមន៍ដែលបានស៊ូទ្រាំនឹងបញ្ហា ផ្គត់ផ្គង់ទឹកជាច្រើនឆ្នាំ និងជាកន្លែងដែលជំងឺ អាសន្នរោគបានឆក់យកជីវិត មនុស្សនៅក្នុង២០២៣កន្លងមក៕
ប្រែសម្រួល៖ស៊ុនលី
