ចិន ទុកអោយហ្វីលីពីន ធ្វេីការសម្រេចចិត្ដ លេីទំនាក់ទំនងទ្វេភាគី ដែលឈានដល់ផ្លូវបំបែក
ប៉េកាំង៖ រដ្ឋមន្ត្រីការបរទេសចិន លោក វ៉ាង យី បានឧ្យដឹងថា ទំនាក់ទំនងចិន-ហ្វីលីពីន ឥឡូវនេះស្ថិតនៅលើផ្លូវបំបែកមួយ ហើយវាធ្លាក់ទៅលើភាគីហ្វីលីពីន ដើម្បីធ្វើការសម្រេចចិត្តត្រឹមត្រូវ និងសមហេតុផលអំពីផ្លូវខាងមុខ។
លោក វ៉ាង យី ដែលក៏ជាសមាជិក នៃការិយាល័យនយោបាយ នៃគណៈកម្មាធិការកណ្តាលបក្សកុម្មុយនិស្តចិនផងដែរ បានធ្វើការកត់សម្គាល់នេះក្នុងអំឡុង ពេលជួបជាមួយរដ្ឋមន្ត្រីការបរទេសហ្វីលីពីន លោក Ma. Theresa Lazaro នៅទីក្រុងម៉ានីល ប្រទេសហ្វីលីពីន។
រដ្ឋមន្ត្រីការបរទេសចិនរូបនេះ បានពន្យល់លម្អិតអំពីជំហរដ៏ម៉ឺងម៉ាត់របស់ចិន ទៅកាន់ភាគីហ្វីលីពីន និងបានដាក់ពាក្យបណ្តឹងយ៉ាងខ្លាំងប្រឆាំងនឹងអាកប្បកិរិយាមិនប្រុងប្រយ័ត្នរបស់បុគ្គលិកហ្វីលីពីន ដែលបានបុកនាវាអនុវត្តច្បាប់ចិន នៅកោះ Ren’ai Jiao។
លោក វ៉ាង យី បានថ្លែងថា ទំនាក់ទំនងចិន-ហ្វីលីពីន ត្រូវបានឡោមព័ទ្ធ ដោយការលំបាក និងបញ្ហាប្រឈមជាបន្តបន្ទាប់ ក្នុងរយៈពេលប៉ុន្មានឆ្នាំចុងក្រោយនេះ ដែលជាក់ស្តែងមិនមែន ជាផលប្រយោជន៍របស់ភាគីទាំងពីរ និងរារាំងដល់ការអភិវឌ្ឍរបស់ប្រទេសហ្វីលីពីនផ្ទាល់។
ភាគីទាំងពីរគួរតែរួមគ្នាថែរក្សាសន្តិភាព និងការអភិវឌ្ឍ ដែលរកបានដោយលំបាកនៅក្នុងតំបន់ ប៉ុន្តែប្រទេសហ្វីលីពីន កំពុងធ្វើដំណើរក្នុងទិសដៅផ្ទុយពីប្រទេសក្នុងតំបន់ដទៃទៀត ដោយប្រែក្លាយខ្លួនទៅជាប្រភពនៃការរំខានដល់សន្តិភាព និងស្ថិរភាពក្នុងតំបន់។
លោក វ៉ាង យី បានលេីកឡេីងថា ការពិតបានបង្ហាញថា ការអនុញ្ញាតឱ្យកម្លាំងខាងក្រៅជ្រៀតជ្រែកក្នុងកិច្ចការតំបន់ និងការផ្សព្វផ្សាយជម្លោះដែនសមុទ្រ ដោយចេតនា នឹងធ្វើឱ្យប្រទេសហ្វីលីពីន ក្លាយជាកូនអុក ដែលត្រូវបានរៀបចំឡើង ដោយប្រទេសដទៃទៀត ដោយបន្ថែមថា ការប៉ុនប៉ងញុះញង់ណាមួយដែលគាំទ្រដោយប្រទេសខាងក្រៅ នឹងធ្វើឱ្យប្រទេសហ្វីលីពីន ទទួលផលវិបាកដ៏ជូរចត់នៃការបង្កើតរបស់ខ្លួន៕
