យោធាកូរ៉េខាងត្បូង ស្ទើរតែបាញ់ទម្លាក់យន្តហោះ គ្មានមនុស្សបើករបស់អាមេរិក ដែលកំពុងចូលរួមក្នុងសមយុទ្ធរួមគ្នា
បរទេស៖ អគ្គសេនាធិការចម្រុះ (JCS) របស់កូរ៉េខាងត្បូង បាននិយាយថា អធិការយោធាកូរ៉េខាងត្បូង នឹងទៅទស្សនា កងពលមួយនៅថ្ងៃសុក្រ ដើម្បីពិនិត្យមើលឧប្បត្តិហេតុមួយដែលកងទ័ពស្ទើរ តែបាញ់ទម្លាក់យន្តហោះ មិនស្គាល់អត្តសញ្ញាណមួយគ្រឿង នៅជិតព្រំដែនជាមួយកូរ៉េខាងជើង មុនពេលកំណត់ថា វាជាយន្តហោះគ្មានមនុស្សបើក របស់សហរដ្ឋអាមេរិក ដែលកំពុងចូលរួមក្នុងសមយុទ្ធរួមគ្នា។
យោងតាមសារព័ត៌មាន រ៉យទ័រ ចេញផ្សាយនៅថ្ងៃទី៣១ ខែកក្កដា ឆ្នាំ២០២៦ថា អគ្គសេនាធិការចម្រុះ (JCS) របស់កូរ៉េខាងត្បូង បាននិយាយថា យន្តហោះនេះត្រូវបានរកឃើញនៅភាគខាងជើងខេត្ត Gyeonggi កាលពីថ្ងៃព្រហស្បតិ៍ ហើយត្រូវបានដោះស្រាយ ក្រោមនីតិវិធីប្រតិបត្តិការស្តង់ដារ មុនពេលត្រូវបានកំណត់ថា ជាយន្តហោះគ្មានមនុស្ស បើកហ្វឹកហាត់របស់សហរដ្ឋអាមេរិក។
ហេតុការណ៍នេះបានបង្កឱ្យមានការភ័យខ្លាចផ្នែកសន្តិសុខនៅក្នុងតំបន់ព្រំដែនដែលមានកំពែងរឹងមាំ ដោយអង្គភាពយោធាបានចេញសេចក្តីជូនដំណឹងជម្លៀសដល់ប្រជាជន និងកសិករនៅក្នុងតំបន់ត្រួតពិនិត្យជនស៊ីវិលនៅ Cheorwon និងតំបន់ក្បែរនោះ បន្ទាប់ពីយន្តហោះត្រូវបានរកឃើញ, នេះបើយោងតាមរបាយការណ៍ប្រព័ន្ធផ្សព្វផ្សាយ។
បើយោងតាមរបាយការណ៍គឺកងកម្លាំងកូរ៉េខាងត្បូងដំបូងឡើយមិនអាចកំណត់ថាតើយន្តហោះនេះមានលក្ខណៈមិត្តភាព ឬអាចមកពីកូរ៉េខាងជើង ហើយបានបង្កើនឥរិយាបថឆ្លើយតបរបស់ពួកគេ និងត្រៀមខ្លួនដើម្បីវាយប្រហារ ខណៈពេលកំពុងតាមដានយន្តហោះ ។
ប្រជាជនបានទទួលការ ជូនដំណឹងជាសារភ្លាមៗបន្ទាប់ពីម៉ោង ២ រសៀល ដោយជំរុញឱ្យប្រជាជន នៅតំបន់ជួរមុខផ្លាស់ទៅជម្រក ឬទីតាំងសុវត្ថិភាពផ្សេងទៀត ។ របាយការណ៍បានបន្ថែមថា ក្រោយមកយោធាបានផ្ញើសារដោយនិយាយថា ស្ថានភាពត្រូវបានដោះស្រាយហើយ បន្ទាប់ពីយន្តហោះនេះ ត្រូវបានកំណត់អត្តសញ្ញាណថាជាយន្តហោះ គ្មានមនុស្សបើករបស់សហរដ្ឋអាមេរិក ដែលចូលរួមក្នុងការហ្វឹកហាត់រួម។
