កងទ័ពអ៊ីស្រាអែល បេីកការវាយឆ្មក់ចូលផ្ទះរដ្ឋមន្ត្រី ប៉ាឡេស្ទីនម្នាក់ នៅតំបន់ West Bank
រ៉ាម៉ាឡា៖ កងកម្លាំងអ៊ីស្រាអែល បានបេីកការវាយឆ្មក់ចូលផ្ទះរបស់រដ្ឋមន្ត្រីប៉ាឡេស្ទីនលោក Mu’ayyad Sha’ban ប្រធានគណៈកម្មការប្រឆាំងនឹងជញ្ជាំង និងការតាំងទីលំនៅនៅក្នុងអង្គការរំដោះប៉ាឡេស្ទីន (PLO) នៅ Tulkarm ខណៈដែលក្រុមអ្នកតាំងទីលំនៅអ៊ីស្រាអែល បានដុតរថយន្តចំនួនបីគ្រឿងនៅក្នុងភូមិក្បែរ Nablus នៅភាគខាងជើង តំបន់ West Bank នេះបើយោងតាមប្រភពរបស់ប៉ាឡេស្ទីន។
លោក Sha’ban បានប្រាប់អ្នកយកព័ត៌មានថា កងកម្លាំងអ៊ីស្រាអែល បានវាយឆ្មក់ចូលផ្ទះរបស់លោក នៅជាយក្រុង Danaba ភាគខាងកើតនៃតំបន់ Tulkarm ដោយចាប់សួរចម្លើយលោក និងគំរាមកំហែងលោក អំពីជំហរប្រឆាំងនឹងការតាំងទីលំនៅរបស់លោក។
លោកបានលេីកឡេីងថា កងកម្លាំងអ៊ីស្រាអែល បានធ្វើការឆែកឆេរផ្ទះយ៉ាងហ្មត់ចត់ ដោយរុះរើទ្រព្យសម្បត្តិ និងបង្កការខូចខាត មុនពេលឃុំខ្លួនលោក និងសមាជិកគ្រួសាររបស់លោក នៅក្នុងបន្ទប់ដាច់ដោយឡែកពីគ្នា។
គណៈកម្មការបានថ្កោលទោសការវាយឆ្មក់នេះ នៅក្នុងសេចក្តីថ្លែងការណ៍មួយ ដោយហៅវាថាជា “ការវាយប្រហារ ដែលកំណត់គោលដៅលើមេដឹកនាំជាតិ និងស្ថាប័នផ្លូវការរបស់ប៉ាឡេស្ទីន” ហើយពិពណ៌នាវាថាជា “គំរូច្បាស់លាស់ នៃការបំភិតបំភ័យ និងសម្ពាធ” លើតួនាទីរបស់លោក Sha’ban ក្នុងការប្រឈមមុខនឹងគោល នយោបាយរឹបអូសដីធ្លី និងការផ្លាស់ទីលំនៅរបស់អ៊ីស្រាអែល។
មិនមានការអត្ថាធិប្បាយភ្លាមៗ ពីភាគីអ៊ីស្រាអែលនោះទេ ។ ដោយឡែកពីគ្នា ប្រភពប៉ាឡេស្ទីន បានរាយការណ៍ថា អ្នកតាំងលំនៅបានដុតយានយន្តចំនួនបីគ្រឿង និងវាយប្រហារផ្ទះ របស់ប្រជាជនប៉ាឡេស្ទីនផងដែរ៕
ប្រែសម្រួល ឈូក បូរ៉ា
