ប្រទេសចិន ផ្តល់អំណាចដល់ប្រទេសនានា នៅសកលខាងត្បូង តាមរយៈបច្ចេកវិទ្យា AI
ប៉េកាំង៖ កាលពីថ្ងៃពុធ រ៉ុក្កែតមួយគ្រាប់ ត្រូវបានបាញ់បង្ហោះចេញពីដែនទឹកនៃខេត្តសានតុង ភាគខាងកើតប្រទេសចិន ដោយបានដាក់ផ្កាយរណប ដែលដំណើរការដោយ AI ចំនួនពីរចូលទៅក្នុងគន្លងផែនដីដោយជោគជ័យ។
ដោយផ្តល់សេវាកម្មចាប់សញ្ញាពីចម្ងាយឆ្លាតវៃ ដល់អ៊ូសបេគីស្ថាន និងឥណ្ឌូនេស៊ី បេសកកម្មនេះ តំណាងឱ្យវឌ្ឍនភាពថ្មី នៅក្នុងកិច្ចខិតខំប្រឹងប្រែងរបស់ប្រទេសចិន ក្នុងការផ្តល់អំណាចដល់សកលប្រទេសសកល ខាងត្បូងតាមរយៈ AI។
យោងតាមអ្នកអភិវឌ្ឍន៍ផ្កាយរណប Star.ai Spatio-temporal Intelligence Technology Co., Ltd ផ្កាយរណបមួយនឹងសហការជាមួយអ៊ូសបេគីស្ថាន ដើម្បីធ្វើការត្រួតពិនិត្យវដ្តពេញលេញ នៃឧស្សាហកម្មកប្បាសរបស់ប្រទេស ដែលគ្មានឆ្នេរសមុទ្រ ខណៈដែលផ្កាយរណបមួយទៀត នឹងការពារផលិតកម្មកសិកម្មរបស់ប្រទេសឥណ្ឌូនេស៊ី ដោយតាមដានការលូតលាស់ដំណាំយ៉ាងច្បាស់លាស់ និងវាយតម្លៃហានិភ័យគ្រោះមហន្តរាយ។
លោក Song Bingchen សហស្ថាបនិករបស់ Star.ai បានឧ្យដឹងថា “យើងចូលរួមក្នុងកិច្ចសហប្រតិបត្តិការយ៉ាងស៊ីជម្រៅជាមួយប្រទេសទាំងពីរនេះ ដែលគ្របដណ្តប់លើវិស័យកសិកម្ម ឧតុនិយម និងការរុករករ៉ែ”។
ដោយដំណើរការដោយក្បួនដោះស្រាយ AI ផ្កាយរណបទាំងនេះអាចអនុវត្តភារកិច្ចកុំព្យូទ័រដោយផ្ទាល់នៅក្នុងលំហ។ លោក Song បានលេីកឡេីងថា “ក្នុងការព្រមានជាមុនអំពីគ្រោះមហន្តរាយ ផ្កាយរណបឆ្លាតវៃរបស់យើងអាចផ្តល់ការណែនាំអំពីការសម្រេចចិត្តជាក់លាក់ក្នុងរយៈពេលប៉ុន្មាននាទី ដែលជាការលោតផ្លោះប្រសិទ្ធភាពយ៉ាងខ្លាំងបើប្រៀបធៀបទៅនឹងផ្កាយរណបប្រពៃណីដែលចំណាយពេលច្រើនម៉ោង ដើម្បីវាយតម្លៃស្ថានភាព”។
ក្នុងរយៈពេលប៉ុន្មានឆ្នាំចុងក្រោយនេះ ប្រទេសចិនបានឃើញបច្ចេកវិទ្យាឆ្លាតវៃរបស់ខ្លួនត្រូវបានដាក់ពង្រាយកាន់តែខ្លាំងឡើងនៅទូទាំងតំបន់ ក្នុងវិស័យដូចជាការកាត់បន្ថយគ្រោះមហន្តរាយ និងកសិកម្ម ដែលជួយភ្ជាប់គម្លាតឌីជីថល។
កាលពីខែមុន ក្រុមស្រាវជ្រាវមួយមកពីសាកលវិទ្យាល័យ Fudan បានឃើញកម្មវិធីព្រមានជាមុន និងកាត់បន្ថយគ្រោះមហន្តរាយ AI ចិន-អាហ្វ្រិករបស់ខ្លួន ត្រូវបានជ្រើសរើសជាផ្លូវការ សម្រាប់ទសវត្សរ៍វិទ្យាសាស្ត្រអន្តរជាតិ សម្រាប់ការអភិវឌ្ឍប្រកបដោយចីរភាពរបស់អង្គការសហប្រជាជាតិ។
លោក Zhang Yuning សមាជិកក្រុមគម្រោងរបស់ Fudan បានឧ្យដឹងថា “ប្រទេសចិនគឺជាប្រទេសឈានមុខគេលើពិភពលោកក្នុងវិស័យអាកាសចរណ៍ និងបច្ចេកវិទ្យា AI ដ៏ទូលំទូលាយ ខណៈដែលទ្វីបអាហ្វ្រិកងាយរងគ្រោះខ្លាំង ចំពោះគ្រោះមហន្តរាយធម្មជាតិញឹកញាប់ ប៉ុន្តែខ្វះសមត្ថភាពបង្ការ និងកាត់បន្ថយគ្រោះមហន្តរាយដ៏រឹងមាំ”៕
ប្រែសម្រួល ឈូក បូរ៉ា
