ម៉ិកស៊ិក ប្រកាសផែនការសន្តិសុខ ដើម្បីបន្តការនាំចេញផ្លែបឺរ ទៅកាន់សហរដ្ឋអាមេរិក
ម៉ិកស៊ិក៖ ប្រធានាធិបតីម៉ិកស៊ិក លោកស្រី Claudia Sheinbaum បានឧ្យដឹងថា រដ្ឋាភិបាលរបស់លោកស្រី កំពុងធ្វើការលើផែនការសកម្មភាព ដើម្បីជំរុញសន្តិសុខនៅក្នុងរដ្ឋ Michoacan ដែលរងគ្រោះដោយឧក្រិដ្ឋកម្ម ដូច្នេះការនាំចេញផ្លែបឺររបស់ខ្លួនទៅ កាន់សហរដ្ឋអាមេរិក អាចបន្តឡើងវិញបាន បន្ទាប់ពីពួកគេត្រូវបានផ្អាកម្តងទៀត ដោយសារការព្រួយបារម្ភអំពីសុវត្ថិភាព។
នៅក្នុងសន្និសីទសារព័ត៌មានប្រចាំថ្ងៃរបស់លោកស្រីនៅវិមានជាតិ លោកស្រី Sheinbaum បានឧ្យដឹងថា យុទ្ធសាស្ត្រនេះមានគោលបំណងធានាបន្ថែមទៀតនូវសន្តិសុខនៅក្នុងតំបន់មួយចំនួននៃរដ្ឋ Michoacan ជាកន្លែងដែលឆ្មាំជាតិមានវត្តមានមានកំណត់ ខណៈពេលដែលរក្សាការចរចាជាមួយអាជ្ញាធរអាមេរិកក្នុងពេលដំណាលគ្នា។
លោកស្រីបានលេីកឡេីងថា “យើងសង្ឃឹមថាវានឹងបន្តឡើងវិញក្នុងពេលឆាប់ៗនេះ (សំដៅទៅលើការនាំចេញ) ហើយនោះហើយជាមូលហេតុ ដែលយើងកំពុងចរចា និងក្នុងពេលជាមួយគ្នានេះ ពង្រឹងសន្តិសុខនៅក្នុង តំបន់មួយចំនួនដែលឆ្មាំមិនមានវត្តមានច្រើន”។
លោកស្រី Sheinbaum បានបន្ដថា លោកស្រីបានជួបជាមួយអ្នកដាំ និងនាំចេញផ្លែបឺរនៅរដ្ឋ Michoacan ដែលជាប្រទេសផលិត និង នាំចេញផ្លែបឺរឈានមុខគេទៅកាន់ទីផ្សារសហរដ្ឋអាមេរិក បន្ទាប់ពីសហរដ្ឋអាមេរិក បានចេញការជូនដំណឹងសន្តិសុខសម្រាប់តំបន់នេះ។
ក្នុងពេលជាមួយគ្នានេះ ក្រសួងកសិកម្ម និង អភិវឌ្ឍន៍ជនបទម៉ិកស៊ិកបានស្នើសុំជួបជាមួយ ស្ថានទូតសហរដ្ឋអាមេរិក ឱ្យបានឆាប់ តាមដែលអាចធ្វើទៅបាន ដើម្បីស្នើឱ្យការ ត្រួតពិនិត្យបន្តឡើងវិញ ដោយមានវត្តមានរបស់អ្នក ត្រួតពិនិត្យមកពីសេវា សុវត្ថិភាពចំណីអាហារជាតិរបស់ខ្លួន៕
