អ៊ីរ៉ង់ ធ្វើការទាមទារថ្មីជុំវិញបញ្ហាច្រកសមុទ្រ Hormuz ក្រោយការវាយប្រហារដោយមីស៊ីល លើនាវារបស់អារ៉ាប់រួម
បរទេស៖ យោងតាមការចេញផ្សាយរបស់ RT ក្រុមប្រឹក្សាសន្តិសុខជាតិកំពូលរបស់អ៊ីរ៉ង់ បានដាក់លក្ខខណ្ឌថ្មីសម្រាប់សហរដ្ឋអាមេរិក ដើម្បីជួបមុនពេលច្រកសមុទ្រ Hormuz អាចបើកឡើងវិញ ចំពេលមានការវាយប្រហារ បន្តលើការដឹកជញ្ជូនបន្ថែមទៀត។
នៅក្នុងសេចក្តីថ្លែងការណ៍ដែលធ្វើឡើង ដោយប្រព័ន្ធផ្សព្វផ្សាយអ៊ីរ៉ង់កាលពីថ្ងៃសៅរ៍ លេខាធិការក្រុមប្រឹក្សាលោក Mohammad Baqer Zolqadr បាននិយាយថា ផ្លូវទឹកដែលគ្រប់គ្រងជុំវិញមួយភាគបួន នៃពាណិជ្ជកម្មប្រេងសមុទ្រ និងឧស្ម័ន LNG នឹងមិនត្រូវបានបើកឡើងវិញទេរហូតដល់សហរដ្ឋអាមេរិក ផ្លាស់ប្តូរឥរិយាបថជាមុនសិន។
លោកបាននិយាយថា សហរដ្ឋអាមេរិកត្រូវតែលុបចោល ការបិទផ្លូវជើងទឹករបស់ខ្លួនលើកំពង់ផែអ៊ីរ៉ង់ ហើយដកកងកម្លាំងរបស់ខ្លួនចេញពីតំបន់ជុំវិញអ៊ីរ៉ង់ ក៏ដូចជាដកទណ្ឌកម្ម អយុត្តិធម៌ និងខុសច្បាប់ ដោះលែងទ្រព្យសម្បត្តិដែលជាប់គាំងរបស់ប្រទេស និងទូទាត់សំណងទាំងអស់។ លោកបានបន្ថែមថា សហរដ្ឋអាមេរិកត្រូវតែបញ្ចប់ សង្រ្គាម និងការឈ្លានពាន ប្រឆាំងនឹងអ៊ីរ៉ង់ និងសម្ព័ន្ធមិត្តរបស់ខ្លួននៅក្នុងប្រទេសអ៊ីរ៉ាក់ លីបង់ ប៉ាឡេស្ទីន និងយេម៉ែន។
លោក Zolqadr បាននិយាយថាសហរដ្ឋអាមេរិក មិនត្រូវគំរាមកំហែងអ៊ីរ៉ង់ជាភាសាណាមួយ ឬប្រមាថតម្លៃដ៏ពិសិដ្ឋរបស់ប្រទេសអ៊ីរ៉ង់ឡើយ។
នៅព្រឹកថ្ងៃសៅរ៍ អេមីរ៉ាតអារ៉ាប់រួមបាននិយាយថា មីស៊ីលរបស់អ៊ីរ៉ង់បានវាយប្រហារកប៉ាល់ដឹកប្រេង ដែលដំណើរការដោយក្រុមហ៊ុនប្រេងរដ្ឋរបស់ខ្លួន ADNOC ដោយចោទប្រកាន់ទីក្រុងតេហរ៉ង់ ពីបទធ្វើសកម្មភាពដូចចោរសមុទ្រ។ អ៊ីរ៉ង់ទទូចថា នាវាទាំងអស់ដែលឆ្លងកាត់ច្រកសមុទ្រត្រូវតែអនុវត្ត តាមការណែនាំរបស់ខ្លួន និងជៀសវាងនូវអ្វីដែលខ្លួនហៅថា ផ្លូវខុសច្បាប់ដែលកំណត់ដោយកងទ័ពជើងទឹកអាមេរិក៕
ប្រែសម្រួល៖ ស៊ុន លី
