រដ្ឋាភិបាលថៃ បញ្ជាឱ្យពិនិត្យឡើងវិញ នូវការគ្រប់គ្រងអាវុធ បន្ទាប់ពីការបាញ់ប្រហារ ដ៏សាហាវចំនួន ២ នៅជិតទីក្រុងបាងកក
បរទេស៖ រដ្ឋាភិបាលថៃនៅថ្ងៃពុធបានសន្យាថា នឹងរឹតបន្តឹងការគ្រប់គ្រងអាវុធ និងបង្ក្រាបអាវុធខុសច្បាប់ បន្ទាប់ពីការបាញ់ប្រហារដ៏សាហាវពីរករណី នៅជិតទីក្រុងបាងកកក្នុងរយៈពេលតិចជាងមួយសប្តាហ៍ បានធ្វើឱ្យមានសម្ពាធឡើងវិញ លើអាជ្ញាធរ ដើម្បីទប់ស្កាត់អំពើហិង្សាដោយកាំភ្លើង។
យោងតាមសារព័ត៌មាន AP ចេញផ្សាយ នៅថ្ងៃទី១២ ខែសីហា ឆ្នាំ២០២៦ថា ប្រទេសថៃមានអត្រា នៃការកាន់កាប់អាវុធ ខ្ពស់បំផុតមួយនៅអាស៊ី ទោះបីជាច្បាប់អាវុធរបស់ខ្លួនមានកម្រិតក៏ដោយ។ ការបាញ់ប្រហារពីរលើកថ្មីៗនេះ ដែលទាំងពីរនៅខេត្តណនថាបុរីភាគពាយ័ព្យនៃរដ្ឋធានីបាងកក បានបង្កើនការអំពាវនាវឱ្យមានការអនុវត្តច្បាប់កាន់តែតឹងរ៉ឹង និងការគ្រប់គ្រងអាវុធកាន់តែតឹងរ៉ឹង។
សិស្សម្នាក់បានបើកការបាញ់ប្រហារនៅវិទ្យាល័យ និងផ្ទះគ្រួសាររបស់គាត់កាលពីថ្ងៃសុក្រ ដោយបានសម្លាប់មនុស្សយ៉ាងហោចណាស់៨នាក់ និងធ្វើឱ្យរបួសជាង២០នាក់ទៀត មុនពេលបាញ់សម្លាប់ខ្លួន នេះបើយោងតាមប៉ូលីស។ បីថ្ងៃក្រោយមក អតីតសមាជិកសភាម្នាក់ត្រូវបានចាប់ខ្លួន បន្ទាប់ពីការបាញ់ប្រហារ នៅការិយាល័យរដ្ឋាភិបាលដែលបានសម្លាប់មនុស្សម្នាក់ និងធ្វើឱ្យមនុស្សម្នាក់ទៀតរងរបួស។
កាលពីថ្ងៃអង្គារ នាយករដ្ឋមន្ត្រីថៃ អនុទីន ឆានវីរៈគុល បានបញ្ជាឱ្យពិនិត្យឡើងវិញជាបន្ទាន់នូវបទប្បញ្ញត្តិអាវុធ រួមទាំងការផ្អាកលិខិតអនុញ្ញាតថ្មីក្នុងការទិញអាវុធ និងការពិនិត្យឡើងវិញនូវលិខិតអនុញ្ញាតដែលមានស្រាប់ នេះបើយោងតាមសេចក្តីថ្លែងការណ៍ មួយពីវិមានរដ្ឋាភិបាល។
ប្រែសម្រួលៈ ណៃ តុលា
