អ៊ីរ៉ង់ បញ្ជាក់ថា គ្មានការបើកច្រកសមុទ្រហ័រមូស ឡើងវិញនោះទេ
តេអេរ៉ង់៖ អាជ្ញាធរច្រកសមុទ្រឈូងសមុទ្រពែរ្ស (PGSA) របស់អ៊ីរ៉ង់ ដែលជាស្ថាប័នទទួលខុសត្រូវ ចំពោះចរាចរណ៍ផ្លូវសមុទ្រនៅក្នុងច្រកសមុទ្រហ័រមូស បានបដិសេធការអះអាង របស់មន្ត្រីអាមេរិកថា ផ្លូវទឹកនេះនៅតែបើកចំហ ហេីយបានបញ្ជាក់ថា គ្មានការបើកច្រកសមុទ្រហ័រមូស ឡើងវិញនោះទេ។
PGSA បានឧ្យដឹងនៅក្នុងសារប្រព័ន្ធផ្សព្វផ្សាយសង្គមមួយនៅលើ X ថា “ការអះអាង និងការបង្ហោះម្តងហើយម្តងទៀតរបស់មន្ត្រីអាមេរិកថា ច្រកសមុទ្រហ័រមូស លែងត្រូវបានរារាំងទៀតហើយ មិនបានផ្លាស់ប្តូរការពិតនោះទេ”។
ទីបញ្ជាការយោធាសំខាន់របស់អ៊ីរ៉ង់ គឺទីបញ្ជាការកណ្តាល Khatam al-Anbiya បានឧ្យដឹងថា គ្មាននាវាពាណិជ្ជកម្ម ឬនាវាដឹកប្រេងណាមួយ ឬនឹងអាចឆ្លងកាត់ច្រកសមុទ្រហ័រមូស ដោយសុវត្ថិភាពដោយគ្មានការអនុញ្ញាត និងការត្រួតពិនិត្យពីកងកម្លាំងប្រដាប់អាវុធអ៊ីរ៉ង់នោះទេ។
នៅក្នុងសារវីដេអូមួយ ដែលផ្សាយដោយប្រព័ន្ធផ្សព្វផ្សាយអ៊ីរ៉ង់ លោក Ebrahim Zolfaghari អ្នកនាំពាក្យទីបញ្ជាការ បានឧ្យដឹងថា ដូចកាលពីអតីតកាល ច្រកសមុទ្រហ័រមូស ស្ថិតនៅក្រោមការគ្រប់គ្រង និងការគ្រប់គ្រងពេញលេញរបស់អ៊ីរ៉ង់ ដោយបដិសេធការអះអាងរបស់សហរដ្ឋអាមេរិក អំពីការឆ្លងកាត់ធម្មតារបស់នាវាឆ្លងកាត់ច្រកសមុទ្រហ័រមូស ថាជា “មិនពិត និងគ្មានអ្វីក្រៅពីការភូតកុហក”។
លោកបានបន្ថែមថា ការអះអាង “មិនពិត” របស់សហរដ្ឋអាមេរិក គឺបង្ហាញពី “ភាពអស់សង្ឃឹម” របស់កងទ័ពរបស់ខ្លួន ដោយសង្កត់ធ្ងន់ថា មេដឹកនាំ និងកងទ័ពសហរដ្ឋអាមេរិក បានសាកល្បង “អំណាច និងការតស៊ូ” របស់កងកម្លាំងប្រដាប់អាវុធអ៊ីរ៉ង់ បានយ៉ាងល្អ។
លោកបានសង្កត់ធ្ងន់ថា កងកម្លាំងប្រដាប់អាវុធអ៊ីរ៉ង់កំពុងតាមដានចលនាទាំងអស់របស់សហរដ្ឋអាមេរិក និងអ៊ីស្រាអែល នៅក្នុងតំបន់ ហើយនឹងមិនស្ទាក់ស្ទើរក្នុងការការពារសិទ្ធិរបស់ប្រជាជនអ៊ីរ៉ង់ ក៏ដូចជាអធិបតេយ្យភាពជាតិ និងសេចក្តីប្រាថ្នារបស់ប្រទេសនោះទេ ហើយនឹងឆ្លើយតបទៅនឹងការគំរាមកំហែងណាមួយ។
ការកត់សម្គាល់របស់លោកបានកើតឡើងបន្ទាប់ពីប្រធានាធិបតីអាមេរិក លោក ដូណាល់ ត្រាំ បានអះអាងនៅលើបណ្តាញសង្គមថា សហរដ្ឋអាមេរិករក្សា «ការគ្រប់គ្រងទាំងស្រុង» លើច្រកសមុទ្រហ័រមូស៕
ប្រែសម្រួល ឈូក បូរ៉ា
