អ៊ីរ៉ង់ និងអាមេរិក ផ្លាស់ប្តូរការគំរាមកំហែងថ្មីៗដាក់គ្នា ខណៈលោក ត្រាំ ព្រមានថា អ៊ីរ៉ង់នឹងជួបការបរាជ័យផ្នែកសេដ្ឋកិច្ច ឬមេដឹកនាំរបស់ខ្លួនត្រូវបានសម្លាប់
តេអេរ៉ង់៖ អ៊ីរ៉ង់ និងសហរដ្ឋអាមេរិកបានផ្លាស់ប្តូរការគំរាមកំហែងថ្មីៗដាក់គ្នា ដោយប្រធានាធិបតី ដូណាល់ ត្រាំ បានព្រមានថា អ៊ីរ៉ង់នឹងជួបបរាជ័យផ្នែកសេដ្ឋកិច្ច ឬប្រឈមមុខនឹងការបំផ្លាញថ្នាក់ដឹកនាំរបស់ខ្លួនចោល ប្រសិនបើមិនព្រមឈានដល់កិច្ចព្រមព្រៀងណាមួយ ខណៈដែលយោធាអ៊ីរ៉ង់ បានអះអាងថា ខ្លួននឹងសងសឹកយ៉ាងធ្ងន់ធ្ងរ ចំពោះការវាយប្រហារថ្មីណាមួយ។
ជម្លោះនេះហាក់ដូចជាជាប់គាំង អស់រយៈពេលជាច្រើនខែមកហើយ ដោយគ្មានសញ្ញាណាមួយបង្ហាញថា ភាគីណាមួយត្រៀមខ្លួនរួចរាល់ក្នុងការសម្របសម្រួលគ្នាឡើយ ទោះបីជាវាបានធ្វើឱ្យវិបត្តិថាមពលសកលកាន់តែធ្ងន់ធ្ងរ បំផ្លាញផ្នែកសំខាន់ៗនៃសេដ្ឋកិច្ចអ៊ីរ៉ង់ និងបង្កឱ្យមានការកើនឡើង នៃភាពតានតឹងថ្មីៗនៅក្នុងតំបន់ក៏ដោយ។
អ្នកយកព័ត៌មានរបស់ទូរទស្សន៍ Fox News បានរាយការណ៍ថា នៅក្នុងការសន្ទនា តាមទូរស័ព្ទជាមួយពួកគេ លោក ត្រាំ បានឧ្យដឹងថា ថ្នាក់ដឹកនាំអ៊ីរ៉ង់ គួរតែឈានដល់កិច្ចព្រមព្រៀងមួយ បើមិនដូច្នោះទេ ពួកគេនឹងត្រូវរលាយហិនហោច ផ្នែកសេដ្ឋកិច្ច ឬត្រូវបំផ្លាញចោលតែម្តង។
ទោះជាយ៉ាងណាក៏ដោយ អ្នកយកព័ត៌មានរបស់ Fox News ដដែលនោះបានបន្ថែមថា ដោយសារប្រធានាធិបតីអ៊ីរ៉ង់ លោក Masoud Pezeshkian ត្រូវបានគេរំពឹងថា នឹងមកដល់ទីក្រុងញូវយ៉ក នៅសប្តាហ៍នេះ ដើម្បីចូលរួមមហាសន្និបាត អង្គការសហប្រជាជាតិ លោក ត្រាំ បានឧ្យដឹងថា លោកបើកចំហចំពោះលទ្ធភាព នៃការជួបពិភាក្សា ជាមួយមេដឹក នាំរូបនេះ។
លោក ត្រាំ ធ្លាប់បានធ្វើការគំរាមកំហែង មិនច្បាស់លាស់ជាច្រើន ដងអំពីការបង្កើនសកម្មភាពយោធាទ្រង់ទ្រាយធំក្នុងអំឡុងពេលជម្លោះនេះ ដែលបានចាប់ផ្តើមឡើងជាមួយនឹងការវាយប្រហាររបស់សហរដ្ឋអាមេរិក និងអ៊ីស្រាអែលកាលពីថ្ងៃទី ២៨ ខែកុម្ភៈ ប៉ុន្តែលោកមិនបានអនុវត្តការគំរាមកំហែងទាំងនោះជាក់ស្តែងឡើយ៕
ប្រែសម្រួល ឈូក បូរ៉ា
