កិច្ចប្រជុំកំពូលសហភាពអឺរ៉ុប ដែលផ្តោតលើការប្រកួតប្រជែង និងតម្លៃថាមពល បញ្ចប់ដោយគ្មានផ្លែផ្កា ហេីយសន្និសីទសារព័ត៌មានរួម ត្រូវបានលុបចោល
ព្រុចសែល៖ មេដឹកនាំសហភាពអឺរ៉ុប បានជួបជុំគ្នានៅទីក្រុងព្រុចសែល កាលពីថ្ងៃព្រហស្បតិ៍ ក្នុងកិច្ចប្រជុំកំពូល រយៈពេលពីរថ្ងៃ ដែលផ្តោតលើភាពអាចប្រកួតប្រជែង ផ្នែកសេដ្ឋកិច្ច តម្លៃថាមពលខ្ពស់ និងថវិការយៈពេលវែង បន្ទាប់របស់សហភាពអឺរ៉ុប។ ថ្ងៃដំបូងនៃកិច្ចប្រជុំបាន បញ្ចប់ទៅដោយមានភាពខុសគ្នានៃទស្សនៈ ហើយសន្និសីទសារព័ត៌មាន ដែលបានគ្រោងទុកក៏ត្រូវបានលុបចោលផងដែរ។
យោងតាមរបៀបវារៈរបស់ក្រុមប្រឹក្សាអឺរ៉ុប បញ្ហាប្រឈមផ្នែកសេដ្ឋកិច្ចគឺជាប្រធានបទសំខាន់បំផុត។ មេដឹកនាំសហភាពអឺរ៉ុប ត្រូវបានរំពឹងថា នឹងផ្តល់ការណែនាំដល់គណៈកម្មការអឺរ៉ុប អំពីវិធានការរយៈពេលខ្លី ដែលមានគោលដៅច្បាស់លាស់ ដើម្បីកាត់បន្ថយផលប៉ះពាល់ នៃតម្លៃថាមពលខ្ពស់មកលើអាជីវកម្ម និងគ្រួសារនានា។
បណ្ដាមេដឹកនាំអឺរ៉ុប ក៏នឹងពិភាក្សា អំពីកិច្ចខិតខំប្រឹងប្រែងរយៈពេលវែង ដើម្បីកាត់បន្ថយការពឹងផ្អែក របស់អឺរ៉ុបលើឥន្ធនៈហ្វូស៊ីលផងដែរ។ ការកើនឡើងយ៉ាងគំហុកនៃតម្លៃថាមពលនាពេលថ្មីៗនេះ បានបង្កើនក្តីបារម្ភអំពីភាពអាចប្រកួតប្រជែងរបស់សហភាពអឺរ៉ុប។
ប្រធានគណៈកម្មការអឺរ៉ុប លោកស្រី Ursula von der Leyen ថ្មីៗនេះបានថ្លែងប្រាប់សភាអឺរ៉ុបថា តម្លៃឧស្ម័នធម្មជាតិនៅអឺរ៉ុបបានកើនឡើង ១៤០ ភាគរយចាប់តាំងពីចុងខែកុម្ភៈមក ខណៈដែលតម្លៃប្រេងម៉ាស៊ូតបានកើនឡើងទ្វេដង។ ស្ថានភាពនេះបានបន្ថែមបន្ទុកចំណាយប្រហែល ១០០ ពាន់លានអឺរ៉ូ (ប្រហែល ១១២,១ ពាន់លានដុល្លារអាមេរិក) ទៅលើវិក្កយបត្រនាំចូលឥន្ធនៈហ្វូស៊ីលរបស់សហភាពអឺរ៉ុប។
ដោយសាររដូវរងាកំពុងខិតជិតមកដល់ តម្លៃថាមពលខ្ពស់អាចនឹងបង្កើនសម្ពាធបន្ថែមទៀតលើឧស្សាហកម្ម និងគ្រួសារនានានៅអឺរ៉ុប។
ថវិការយៈពេលវែងបន្ទាប់របស់សហភាពអឺរ៉ុប គឺជាប្រធានបទសំខាន់មួយទៀតនៅក្នុងរបៀបវារៈ។ មេដឹកនាំនានានឹងបន្តពិភាក្សាអំពី ក្របខ័ណ្ឌហិរញ្ញវត្ថុពហុឆ្នាំ សម្រាប់ឆ្នាំ ២០២៨-២០៣៤ ដោយព្យាយាមបង្រួបបង្រួមចំណុចសំខាន់ៗដែលចាំបាច់ ដើម្បីឈានដល់កិច្ចព្រមព្រៀងចុងក្រោយនៅចុងឆ្នាំ ២០២៦៕
