ភ្នំពេញ៖ លោក ឃាង ពុទ្ធី ប្រធានក្រុមប្រឹក្សាភិបាល សមាគមអ្នកជំនាញអចលនទ្រព្យ (CREA)នៅថ្ងៃព្រហស្បត្តិ៍ ទី២៦ ខែសីហា ឆ្នាម២០២១ បានផ្តល់ក្តីសង្ឃឹមថា ទីផ្សារអចលនទ្រព្យ នឹងល្អប្រសើរឡើងវិញ នៅចុងឆ្នាំ២០២១នេះ បន្ទាប់ពីរាជរដ្ឋាភិបាល ធ្វើការចាក់វ៉ាក់សាំង ជូនពលរដ្ឋស្ទើរគ្រប់ ចំនួនកំណត់។
លោក ពុទ្ធី បានលើកឡើងថា “យើងសង្ឃឹមថាទីផ្សារអចលនទ្រព្យរបស់យើង នឹងល្អប្រសើរឡើងវិញនៅចុងឆ្នាំ២០២១នេះ បន្ទាប់ពីរាជរដ្ឋាភិបាល ធ្វើការចាក់វ៉ាក់សាំង ដល់ប្រជាពលរដ្ឋពេញវ័យ រឺគ្រប់អាយុ ត្រឹមខែកញ្ញា សឹងតែរួចរាល់អស់ហើយ”។
លោក ក៏បានបន្ថែមផងដែរថា ប៉ុន្តែស្ថានភាព ដែលគេនឹកស្មានមិនដល់នោះ គឺមេរោគបំលែងខ្លួន ដែលមានស្ថានភាពឆ្លង រីករាលដាលលឿនជាងមុន ហើយដែលធ្វើឱ្យមានស្ថានភាពគ្រោះថ្នាក់ ដល់អាយុជីវិតខ្ពស់ជាមុន ធ្វើឱ្យស្ថានភាពសេដ្ឋកិច្ច នៅលើពិភពលោក ជាពិសេសសហរដ្ឋអាមេរិក និងប្រទេសជិតខាង គឺថៃ និងវៀតណាម ធ្វើការបិទខ្ទប់ប្រទេស និងមានស្ថានភាពមិនច្បាស់លាស់។ ហើយដោយឡែក ប្រទេសកម្ពុជា ក៏អីចឹង។
អ្នកជំនាញអចលនទ្រព្យរូបនេះ បានកត់សម្គាល់ទៀតថា “យើងឃើញថា បច្ចុប្បន្ននេះ ទីផ្សារអចលនទ្រព្យ លំនៅដ្ឋាន …អចលនទ្រព្យជាលក្ខណៈពាណិជ្ជកម្ម (ហាងទំនិញ, ការិយាល័យ, ហាងលក់ទំនិញ, សណ្ឋាគារ, ខុនដូ។ល។…) គឺស្ថិតក្នុងស្ថានភាពមិនច្បាស់លាស់ យើងនៅតែប្រើប្រាស់វិធានការសុខាភិបាល (៣កុំ ៣ការពារ) ចឹងទីផ្សារអចលនទ្រព្យ នៅតែប៉ះពាល់ខ្លាំង និងអូសបន្លាយបន្តទៅទៀត ក្នុងស្ថានភាពមួយស្រពិចស្រពិល ចឹងដរាបណា ប្រទេសកម្ពុជាយើង ត្រូវបានថមថយ បញ្ហាកូវីដហ្នឹង ទាំងបំលែងខ្លួនថ្មី ហើយនិងប្រទេសជិតខាង យើងដែរថា ព្រោះថាសេដ្ឋកិច្ចមានលក្ខណៈជាប្រព័ន្ធ បើប្រទេសជិតខាងយើង មានបញ្ហាក៏អាចធ្វើ ឱ្យប្រទេសរបស់យើង មានបញ្ហាផងដែរ”។
លោក ពុទ្ធី ក៏បានផ្តល់ជាយោបល់ផងដែរថា មុននឹងវិនិយោគអ្វីមួយ ត្រូវគិតពីហានិភ័យឱ្យបានច្បាស់លាស់ តែកាលបើបង់ហើយ មិនមានលទ្ធភាព ធ្វើឱ្យមានការខាតបង់ ។ យើងមិនអាចបង់បន្តបាន ដូច្នោះក្នុងស្ថានភាពមិនច្បាស់លាស់ សូមឱ្យប្រជាពលរដ្ឋគិតឱ្យបានច្បាស់មុននឹងធ្វើការវិនិយោគ។
លោក ក៏បានសូមអំពាវនាវ ឱ្យប្រជាពលរដ្ឋ ចូលរួមទប់ស្កាត់ ជំងឺកូវីដ១៩ ទាំងអស់គ្នា កាលណាជំងឺនេះ ឆាប់បាត់កាលណា នោះសេដ្ឋកិច្ច ពាណិជ្ជកម្ម និងទីផ្សារអចលនទ្រព្យ នឹងឆាប់បានវិលត្រឡប់មកល្អប្រសើរឡើងវិញ៕
