ស្ថានភាពជំនន់ទឹកភ្លៀង

អភិបាលខេត្ត កំពង់ចាម បន្តដឹកនាំ ក្រុមការងារ ចុះពិនិត្យស្ថានភាព ជំនន់ទឹកភ្លៀង ក្នុងសង្កាត់បឹងកុក និងស្រុកកំពង់សៀម

កំពង់ចាម ៖ អភិបាលខេត្តកំពង់ចាម លោក អ៊ុន ចាន់ដា នារសៀលថ្ងៃទី ២២ ខែតុលាឆ្នាំ ២០២០ នេះ បានបន្តដឹកនាំក្រុមការងារ មានប្រធានមន្ទីរពាក់ព័ន្ធ និងអាជ្ញាធរដែនដី ចុះពិនិត្យស្ថានភាពជំនន់ទឹកភ្លៀង នៅក្នុងភូមិសាស្ត្រ សង្កាត់បឹងកុក និងស្រុកកំពង់សៀម ខេត្តកំពង់ចាម។

ដោយសារជំនន់ទឹកភ្លៀង ចេះតែបន្តកើនឡើង ធ្វើឱ្យមាន ទឹកហូរកាត់ផ្លូវជាច្រើនកន្លែង ក្នុងសង្កាត់បឹងកុក និងមានផលប៉ះពាល់ ដល់ផ្ទះប្រជាពលរដ្ឋ មួយចំនួនផងដែរ ។

ទន្ទឹមនឹងនេះ អភិបាលខេត្តកំពង់ចាម លោក អ៊ុន ចាន់ដា បានដឹកនាំក្រុមការងារចុះពិនិត្យស្ថានភាពជំនន់ទឹកភ្លៀង និងបានចាត់វិធានការ ពិនិត្យតាមប្រព័ន្ធលូ និងប្រើគ្រឿងចក្រ ដើម្បីកាយបើកមុខទឹក ឱ្យហូរបានលឿនបញ្ចៀស កុំឲ្យទឹកលិចចូលផ្ទះប្រជាពលរដ្ឋ ។

ផ្ទាំងពាណិជ្ជកម្ម

ដោយឡែក នៅក្នុងភូមិសាស្ត្រស្រុក កំពង់សៀម នៅវេលាម៉ោងប្រមាណ ១០:៣០នាទីព្រឹក នៅចំណុចច្រកចូល ព្រលានយន្តហោះចាស់ មុខរោងចក្រវាយនភ័ណ្ឌខេត្តកំពង់ចាម ស្ថិតនៅក្នុងភូមិអំពិលលើ ឃុំអំពិល រងការប៉ះពាល់ ដោយសារកម្រិតទឹកភ្លៀងធ្លាក់ខ្លាំង កាលពីយប់ ជាហេតុបណ្ដាលឱ្យមានការហូរច្រោះផ្លូវ ។

ប៉ុន្តែយ៉ាងណាក៏ដោយ ខាងអាជ្ញាធរ បានរកវិធីសាស្ត្ររំដោះទឹកចេញ និងកាយប្រព័ន្ធលូដែលរងការកក់ស្ទះ នៅតំបន់នោះ លុះរហូតដល់រសៀលថ្ងៃដដែលនេះ ស្ថានភាពទឹកហូរច្រោះផ្លូវ មានការថមថយ រីឯអ្នកដំណើរតាមរថយន្ត អាចធ្វើចរាចរណ៏ទៅមកជាធម្មតា៕

To Top