ព័ត៌មានអន្តរជាតិ

អ្នកនេសាទថៃ ១ម៉ឺននាក់ គ្រោងនាំគ្នាឡើង មកតវ៉ា នៅកណ្តាលទីក្រុង បាងកក

បរទេស៖ ក្រុមអ្នកនេសាទមកពីខេត្ត នៅជាប់ឆ្នេរសមុទ្រចំនួន ២២ កាលពីថ្ងៃព្រហស្បតិ៍បានប្តេជ្ញាថា នឹងប្រមូលផ្តុំគ្នា នៅទីក្រុងបាងកក ដើម្បីដាក់សម្ពាធ ទៅលើរដ្ឋាភិបាល ឱ្យបន្ធូរបន្ថយច្បាប់ និងបទបញ្ញត្តិ ដែលពួកគេនិយាយថា កំពុងគំរាមកំហែង ដល់ជីវភាពរស់នៅរបស់ពួកគេ។

យោងតាមសារព័ត៌មាន បាងកកប៉ុស្តិ៍ ចេញផ្សាយនៅថ្ងៃទី១៣ ខែធ្នូ ឆ្នាំ២០១៩ បានឱ្យដឹងថា លោក Mongkon Sukcharoenkhana ប្រធានសមាគមជលផលជាតិថៃ (NFAT) បាននិយាយថា“ យើងបានជូនដំណឹងដល់ស្ថានីយ៍ប៉ូលីស ណានលៀងរួចហើយ តាមតម្រូវការផ្នែកច្បាប់ ស្តីពីការប្រមូលផ្តុំជាសាធារណៈ ហើយមនុស្សជាង ១ ម៉ឺននាក់មកពី ២២ ខេត្តនឹងមកចូលរួមការប្រមូលផ្តុំនេះ”។

លោកបាននិយាយថា ក្រុមអ្នកតវ៉ានឹងប្រមូលផ្តុំគ្នា នៅខាងក្រៅក្រសួងកសិកម្ម និងសហករណ៍ រហូតដល់ថ្ងៃទី ១៥ ខែមករា ឬរហូតដល់ការទាមទារ របស់ពួកគេត្រូវបានបំពេញ តាមការសន្យាយ៉ាងមុតមាំ នៃការដោះស្រាយ ចំពោះភាគីដែលរងផលប៉ះពាល់។

ប្រធានសមាគមរូបនេះ បន្ថែមថា“ ប្រសិនបើរដ្ឋាភិបាលបដិសេធមិនឆ្លើយតប នឹងតម្រូវការរបស់យើង រដ្ឋាភិបាលគួរតែទិញ ឧបករណ៍នេសាទ និងទូកនេសាទ របស់យើងទាំងអស់ ព្រោះយើងមិនអាចចេញ ទៅធ្វើការបានទៀតទេ” ដោយសារតែបទ បញ្ញត្តិដ៏តឹងរ៉ឹងនេះ” ។

ចំណែកលោក Alongkorn Ponlaboot ទីប្រឹក្សារដ្ឋមន្រ្តីក្រសួង កសិកម្មនិងសហករណ៍ កាលពីថ្ងៃពុធបានស្នើសុំឱ្យ ក្រុមនេសាទបញ្ឈប់ការតវ៉ា ដែលបានគ្រោងទុក របស់ពួកគេនៅក្នុងរដ្ឋធានី។

លោក Alongkorn បានទទូចថា ក្រសួងបានអនុវត្តតាមការទាមទារ ចំនួនប្រាំបី របស់អ្នកនេសាទ ក្នុងចំណោមការទាមទារចំនួន ១១ ចំណុច ដោយនិយាយថា ចំណុចនៅសល់ត្រូវ បានបញ្ជូនទៅទីភ្នាក់ងារផ្សេងទៀត៕
ប្រែសម្រួលៈ ណៃ តុលា

To Top
×