បរទេស៖ កូរ៉េខាងត្បូង បានចេញមុខបន្សាបលើ ការរំពឹងទុកកាន់តែច្រើនឡើង ៗ អំពីសុខភាពរបស់មេដឹកនាំ កូរ៉េខាងជើងលោក គីមជុងអ៊ុន ដោយប្រាប់ CNN ថា លោក គីម គាត់“ មានជីវិត និងមានសុខភាពល្អ” ។
យោងតាមសារព័ត៌មាន MSN ចេញផ្សាយថ្ងៃទី២៧ ខែមេសា ឆ្នាំ២០២០ បានឱ្យដឹងថា លោក មូន ជុងអ៊ិន ទីប្រឹក្សាគោលនយោបាយ ការបរទេសកំពូលរបស់ ប្រធានាធិបតីកូរ៉េខាងត្បូងមូនជេអ៊ីន បានប្រាប់ CNN ថា“ ជំហររដ្ឋាភិបាលរបស់យើងគឺរឹងមាំ” ។ លោកគីមជុងអ៊ុននៅរស់ ហើយមានសុខភាពល្អធម្មតា។ គាត់បានស្នាក់នៅក្នុងតំបន់វ៉ុនសាន ចាប់តាំងពីថ្ងៃទី ១៣ ខែមេសា។
យោងតាមប្រព័ន្ធផ្សព្វផ្សាយ រដ្ឋកូរ៉េខាងជើង KCNA បានអោយដឹងថា មានសំណួរជាច្រើនត្រូវបានគេ លើកឡើងអំពីសុខុមាលភាព របស់លោក គីម បន្ទាប់ពីលោកបានខកខាន ការប្រារព្ធពិធីខួបកំណើតជីតា របស់លោកកាលពីថ្ងៃទី១៥ ខែមេសា។
ទូរទស្សន៍ CNN បានរាយការណ៍នៅដើមសប្តាហ៍នេះថា សហរដ្ឋអាមេរិកកំពុងឃ្លាំមើល ដោយសម្ងាត់ថា លោកគីមកំពុងស្ថិតក្នុង គ្រោះថ្នាក់ធ្ងន់ធ្ងរបន្ទាប់ពីការវះកាត់។ មន្រ្តីអាមេរិកម្នាក់ទៀតបានប្រាប់ CNN នៅថ្ងៃច័ន្ទនេះថា ការព្រួយបារម្ភអំពីសុខភាព របស់លោក គីម គឺអាចទុកចិត្តបាន ប៉ុន្តែភាពធ្ងន់ធ្ងរគឺពិបាក ក្នុងការវាយតម្លៃ។
រឿងនេះកើតឡើងបន្ទាប់ពី របាយការណ៍របស់ Daily NK ដែលជាកាសែតអនឡាញមួយ ដែលមានមូលដ្ឋាននៅប្រទេសកូរ៉េខាងត្បូង ដែលផ្តោតលើប្រទេសកូរ៉េខាងជើងថា លោកគីម ត្រូវបានគេរាយការណ៍ថា បានទទួលនីតិវិធីសរសៃឈាម បេះដូងដោយសារតែ“ ជក់បារីច្រើនពេក ភាពធាត់ជ្រុល និងការងារហួសកម្រិត” ។ វាបានបន្ថែមទៀតថា មេដឹកនាំរូបនេះឥឡូវនេះកំពុងទទួល ការព្យាបាលនៅក្នុងវីឡាមួយនៅតំបន់ Hyangsan ៕
ប្រែសម្រួលៈ ណៃ តុលា
