បរទេស៖លោកស្រីប្រធានាធិបតី ត្សៃ អ៊ីងវិន នៅថ្ងៃសៅរ៍នេះ បានមានប្រសាសន៍ថា កោះតៃវ៉ាន់ចង់ឲ្យមានកិច្ចពិភាក្សាគ្នាប្រកបដោយអត្ថន័យ ជាមួយប្រទេសចិន ស្តីពីមូលដ្ឋានស្មើភាពគ្នា ហើយការអំពាវនាវនេះ គឺធ្វើឡើងស្របពេលមានភាពតានតឹងយោធាកើនកម្តៅខ្លាំងឡើង ជាមួយទីក្រុងប៉េកាំង ដែលអះអាងថាតៃវ៉ាន់ជាទឹកដីរបស់ខ្លួន។
ថ្លែងនៅក្នុងពិធីអបអរទិវាជាតិ លោកស្រីប្រធានាធិបតីតៃវ៉ាន់ បានពិពណ៌នាស្ថានភាពនៅច្រកសមុទ្រតៃវ៉ាន់ថា មានភាពតានតឹងខ្លាំង ដោយរួមជាមួយជម្លោះនៅដែនសមុទ្រចិនខាងត្បូង ជម្លោះព្រំដែនចិន-ឥណ្ឌា និងការបង្ក្រាបរបស់ចិននៅទីក្រុងហុងកុងនោះ នេះបង្ហាញថា លទ្ធិប្រជាធិបតេយ្យនិងសន្តិភាពនៅក្នុងតំបន់ កំពុងតែប្រឈមមុខនឹងភាពលំបាកដ៏ធំ។
គួរបញ្ជាក់ថា កោះតៃវ៉ាន់ដែលកាន់លទ្ធិប្រជាធិបតេយ្យ បានស្ថិតក្រោមសម្ពាធខ្លាំងឡើងពីទីក្រុងប៉េកាំង ដែលបានបង្កើនសកម្មភាពកងកម្លាំងទ័ពអាកាសនៅជិតកោះ ក្នុងកាលពីរបីសប្ដាហ៍កន្លងទៅ ដោយរួមបញ្ចូលទាំងការឆ្លងបន្ទាត់កណ្ដាលច្រកសមុទ្រតៃវ៉ាន់ ដែលប្រើជាតំបន់ទ្រនាប់ក្រៅផ្លូវការមួយ៕
ប្រែសម្រួល៖ប៉ាង កុង
