ភ្នំពេញ៖ ស្ថានទូតអាមេរិកនៅរាជធានីភ្នំពេញ បានបង្ហូតទង់ជាតិពាក់កណ្តាលដង រហូតដល់ថ្ងៃលិច នៃថ្ងៃទី ១៣ មករា ដើម្បីជាការគោរពដល់លោក Brian D. Sicknick និងលោក Howard Liebengood ដែលបានបំពេញការងារ និងធ្វើការពលី ក្នុងនាមជាមន្រ្តីនគរបាលនៅវិមានរដ្ឋសភាសហរដ្ឋអាមេរិក។ លោកទាំងពីរបានការពារយ៉ាងក្លាហាន ចំពោះលទ្ធិប្រជាធិបតេយ្យ និងស្ថាប័នរបស់សហរដ្ឋអាមេរិក ប្រឆាំងនឹងភាពគ្មានច្បាប់ និងគ្មានសណ្តាប់ធ្នាប់។
យោងតាមហ្វេសប៊ុកផេករបស់ស្ថានទូតអាមេរិកប្រចាំកម្ពុជាបានឱ្យដឹងថាលទ្ធិប្រជាធិបតេយ្យរបស់យើងបានឆ្លងកាត់ នូវពិសោធន៍ក្នុងពេលកន្លងមក និងទៅអនាគត ក្នុងពេលដែលយើងខិតខំធ្វើឲ្យមានភាពល្អប្រសើរសម្រាប់ជាតិយើង។ អ្វីដែលយើងឆ្លងកាត់មកនេះ គួរតែមិនធ្វើឲ្យនរណាម្នាក់ រួមទាំងសម្ព័ន្ធមិត្ត ទាំងមិត្ត ឬទាំងសត្រូវ មានការសង្ស័យលើភាពខ្លាំងនៃស្ថាប័នប្រជាធិបតេយ្យ របស់ប្រទេសអាមេរិក ឬប្រជាជនរបស់យើងឡើយ។
សូមរំលឹកថាកាលថ្ងៃទី៦ ខែមករា ២០២១ ក្រុមអ្នកគាំទ្រប្រធានាធិបតី ដូណាល់ ត្រាំ បានសម្រុកចូលវិមានកាពីតូលអាមេរិក ក្នុងចំណោមអគារដ៏ល្បីល្បាញបំផុត របស់អាមេរិក ដែលបង្ករអោយមានអំពើហិង្សា បណ្តាលអោយមនុស្ស៥នាក់ បានបាត់បង់ជីវិត ដែលក្នុងនោះមានប៉ូលីសម្នាក់ និងជនស៊ីវិល៤នាក់ ៕
