ព័ត៌មានអន្តរជាតិ

បណ្ដាមេដឹកនាំ​ អាមេរិក-អឺរ៉ុប អំពាវនាវឲ្យដោះលែង មេដឹកនាំបក្សប្រឆាំង រុស្ស៊ីលោក Alexei Navalny

វ៉ាស៊ីនតោន៖ បណ្ដាមេដឹកនាំសហរដ្ឋអាមេរិក និងសហភាពអឺរ៉ុប បានអំពាវនាវ ឲ្យមានការដោះលែង ជាបន្ទាន់នូវអ្នករិះគន់ របស់វិមានក្រឹមឡាំង និងជាមេដឹកនាំប្រឆាំង គឺលោក Alexei Navalny ដែលត្រូវបានឃុំខ្លួននៅពេលមកដល់ព្រលានយន្តហោះមូស្គូ កាលពីថ្ងៃអាទិត្យ បន្ទាប់ពីលោកបាន ចេញទៅកាន់ប្រទេសរុស្ស៊ី ពីប្រទេសអាល្លឺម៉ង់ ជាលើកដំបូងចាប់តាំងពី លោកត្រូវបានគេបំពុល កាលពីរដូវក្តៅមុន ។

រដ្ឋមន្រ្តីការបរទេស សហរដ្ឋអាមេរិកលោក Mike Pompeo បានលើកឡើងកាលពីថ្ងៃអាទិត្យថា សហរដ្ឋអាមេរិក“ ថ្កោលទោសយ៉ាងខ្លាំង” ចំពោះការចាប់ខ្លួន លោកមេដឹកនាំបក្សប្រឆាំងខាងលើនេះ។

លោកបានបន្ថែមថា“ យើងកត់សម្គាល់ ដោយការព្រួយបារម្ភយ៉ាងខ្លាំងថា ការឃុំខ្លួនលោក គឺជាការប៉ុនប៉ងចុងក្រោយ ដើម្បីបំបិទមាត់លោក Navalny និងឥស្សរជនប្រឆាំងផ្សេងទៀត និងសំលេងឯករាជ្យ ដែលរិះគន់អាជ្ញាធររុស្ស៊ី” ។

លោក Navalny ត្រូវបានឃុំខ្លួននៅអាកាសយានដ្ឋាន Sheremetyevo នៃទីក្រុងមូស្គូ មិនដល់មួយម៉ោងផងបន្ទាប់ពីលោក បានធ្វើដំណើរពីប្រទេសអាល្លឺម៉ង់ ជាកន្លែងដែលលោក បានជាសះស្បើយពីការបំពុល ដែលលោកនិយាយថា ត្រូវបានបញ្ជាដោយប្រធានាធិបតីរុស្ស៊ីលោក វ្លាឌីមៀ ពូទីន។

អ្នកជំនាញលោកខាងលិចសន្និដ្ឋានថា លោក ត្រូវបានបំពុលដោយថ្នាំ Novichok ដែលផលិតដោយសូវៀត។ នៅក្នុងនោះដែរវិមានក្រឹមឡាំង បានបដិសេធរាល់ការពាក់ព័ន្ធណាមួយ ហើយក្រុមអ្នកស៊ើបអង្កេតរុស្ស៊ី បានឲ្យដឹងផងដែរថា គ្មានហេតុផលណាមួយ ដើម្បីបើកការស៊ើបអង្កេតលើករណីនេះ នោះទេ៕

ដោយ ឈូក បូរ៉ា

បំរាម៖ ហាមយកព័ត៌មានរបស់សារព័ត៌មាន ដើមអម្ពិល ចុះផ្សាយដោយគ្មានការជូនដំណឹងមកជាមុន។ រាល់បញ្ហាអត្ថបទដែលយកចុះផ្សាយបន្ត ស្ថាប័នយើងខ្ញុំមិនទទួលខុសត្រូវឡើយ។

All rights reserved by: DAP News

To Top
×