បរទេស៖ រដ្ឋមន្រ្តីក្រសួងសុខាភិបាលប្រទេស កៀហ្ស៊ីស៊ីស្ថាន លោក Alymkadyr Beishenaliev បាននិយាយកាលពីថ្ងៃពុធ នៅក្នុងបទសម្ភាសន៍មួយជាមួយវិទ្យុជាតិ Birinchi ថា ប្រទេសកៀហ្ស៊ីស៊ីស្ថានបានស្នើសុំវ៉ាក់សាំង ការពារមេរោគកូវីដ១៩ចំនួន ៥០០ ០០០ ដូសពីប្រទេសរុស្ស៊ីប្រឆាំង នឹងមេរោគឆ្លងថ្មីនេះ។
យោងតាមសារព័ត៌មាន Sputnik ចេញផ្សាយនៅថ្ងៃទី២០ ខែមករា ឆ្នាំ២០២១ បានឱ្យដឹងដោយផ្អែកតាមការលើកឡើងរបស់លោក Beishenaliev ថា “ថ្នាក់ដឹកនាំរបស់កៀហ្ស៊ីស៊ីស្ថាន បានផ្ញើលិខិតទៅប្រធានាធិបតីរុស្ស៊ីលោក វ្លាឌីមៀ ពូទីន ។ យើងបានស្នើសុំវ៉ាក់សាំងចំនួន ៥០០ ០០០ ដូស” ។
លោកបានបន្ថែមថា កៀហ្ស៊ីស៊ីស្ថាន បានទទួលការយល់ព្រមពីក្រសួងសុខាភិបាលរុស្ស៊ីហើយ បញ្ហានឹងត្រូវបានដោះស្រាយនាពេលខាងមុខនេះ។ បើតាមលោករដ្ឋមន្រ្តីស្ថានភាពជំងឺរាតត្បាតនៅក្នុងប្រទេសនៅតែជួបការលំបាកហើយចាំបាច់ត្រូវចាប់ផ្តើមចាក់វ៉ាក់សាំងឱ្យបានច្រើនដើម្បីត្រឡប់ទៅរកជីវិតធម្មតាវិញ។ កាលពីថ្ងៃអង្គារលោក Beishenaliev បាននិយាយថា ប្រទេសកៀហ្ស៊ីស៊ីស្ថានមិនមានចេតនាដឹកជញ្ជូនការចាក់វ៉ាក់សាំងរបស់ក្រុមហ៊ុន Pfizer នោះទេ ដោយសារប្រទេសនេះខ្វះម៉ាស៊ីនត្រជាក់សមស្របដើម្បីផ្ទុកវ៉ាក់សាំងនេះ។
បើតាមលោករដ្ឋមន្រ្តី គឺថា ទូទឹកកកមួយដែលមានសមត្ថភាព រក្សាសីតុណ្ហភាព គឺត្រូវការចាំបាច់ ប្រហែល ៤០០០ ដុល្លារ។ លោកបន្ថែមថា ២ លានដុល្លារទៀត ត្រូវការជាចាំបាច់ដើម្បីទុកវ៉ាក់សាំង Pfizer COVID-19 ។ ចាប់តាំងពីការផ្ទុះឡើងនៃវីរុសនេះហើយកាលពីដើមឆ្នាំមុន ប្រទេសកៀហ្ស៊ីស៊ីស្ថាន បានបញ្ជាក់ពីការឆ្លងចំនួន ៨៣ ៤៣០ នាក់ក្នុងនោះមានអ្នកស្លាប់ ១ ៣៩២ នាក់៕
