តេអេរ៉ង់៖ អ្នកនាំពាក្យក្រសួងការបរទេសអ៊ីរ៉ង់ បានឲ្យដឹងថា ប្រសិនបើភាគីនានានៃផែនការសកម្មភាពចម្រុះ (JCPOA) ដែលជាកិច្ចព្រមព្រៀងនុយក្លេអ៊ែរអ៊ីរ៉ង់ឆ្នាំ២០១៥ មិនគោរពតាមការប្តេជ្ញាចិត្តរបស់ពួកគេ នោះអ៊ីរ៉ង់ នឹងបញ្ឈប់ការត្រួតពិនិត្យ ដែលពាក់ព័ន្ធនឹងពិធីសារបន្ថែមរបស់ទីភ្នាក់ងារ ថាមពលបរមាណូអន្តរជាតិ។
អ្នកនាំពាក្យ Saeed Khatibzadeh បានលើកឡើងថា“ ច្បាប់សកម្មភាពនៃយុទ្ធសាស្ត្រ (ដើម្បីប្រឆាំងនឹងការដាក់ទណ្ឌកម្ម) របស់សភាគឺច្បាស់ណាស់ ប្រសិនបើភាគី JCPOA ខកខានមិនបានអនុវត្តតាមកាតព្វកិច្ចរបស់ពួកគេ អ៊ីរ៉ង់គួរតែបញ្ឈប់ការត្រួតពិនិត្យ ដែលពាក់ព័ន្ធនឹងពិធីសារបន្ថែមរបស់ IAEA ដែលអ៊ីរ៉ង់ កំពុងអនុវត្តដោយស្ម័គ្រចិត្ត” ។
លោកបានលើកឡើងថា“ ទោះយ៉ាងណាកិច្ចសហប្រតិបត្តិការរបស់អ៊ីរ៉ង់ ជាមួយ IAEA នឹងមិនត្រូវបានផ្អាកនោះទេ ហើយវាមិនមានន័យថាការបណ្តេញអធិការកិច្ចរបស់ IAEA ជាទូទៅនោះទេ ប៉ុន្តែវាមានន័យថា ការបញ្ឈប់ការត្រួតពិនិត្យដែលទាក់ទងនឹងពិធីសារបន្ថែម” ។
កាលពីដើមខែនេះ អ៊ីរ៉ង់ បានចាប់ផ្តើមដំណើរការចម្រាញ់សារធាតុអ៊ុយរ៉ាញ៉ូម ២០ ភាគរយ ដែលជាផ្នែកមួយនៃផែនការសកម្មភាពយុទ្ធសាស្ត្ររបស់អ៊ីរ៉ង់ ដើម្បីប្រឆាំងនឹងទណ្ឌកម្ម ដែលត្រូវបានអនុម័តដោយសភាកាលពីខែធ្នូ ឆ្នាំ២០២០៕ដោយ ឈូក បូរ៉ា
