សេអ៊ូល៖ របាយការណ៍សមាជរបស់សហរដ្ឋអាមេរិកបានឲ្យដឹងថា ការជំរុញរបស់កូរ៉េខាងត្បូង សម្រាប់ការផ្តល់សម្បទានដល់កូរ៉េខាងជើង អាចបន្តបង្កើតភាពតានតឹងនៅក្នុងទំនាក់ទំនងសហរដ្ឋអាមេរិក – កូរ៉េខាងត្បូង នេះបើយោងតាមការចុះផ្សាយរបស់ទីភ្នាក់ងារសារព័ត៌មានយុនហាប់។
របាយការណ៍សេវាកម្មស្រាវជ្រាវសភា (CRS) ដែលបានធ្វើបច្ចុប្បន្នភាព ស្តីពីកូរ៉េខាងត្បូង បានកត់សម្គាល់ថា ការសម្របសម្រួលគោលនយោបាយរវាងក្រុងសេអ៊ូល និងវ៉ាស៊ីនតោន គឺមិនស្ថិតស្ថេរក្រោមការដឹកនាំរបស់អតីតប្រធានាធិបតីអាមេរិក ដូណាល់ ត្រាំ ឡើយ។
ម៉្យាងវិញទៀតប្រធានាធិបតីលោក ចូ បៃដិន កំពុងពង្រឹងសម្ព័ន្ធភាពនេះដោយបង្ហាញថា លោកនឹងបោះបង់ចោលការប្រើប្រាស់ពន្ធគយទណ្ឌកម្មរបស់ប្រធានាធិបតីលោក ត្រាំ ម្តងហើយម្តងទៀតប្រឆាំងនឹងសម្ព័ន្ធមិត្តដូចជាក្រុងសេអ៊ូល និងការទាមទាររបស់លោក សម្រាប់ការបង្កើនចំនួន ៥ ដងនៃការបង់ប្រាក់របស់កូរ៉េខាងត្បូងសម្រាប់ការចំណាយក្នុងការធ្វើជាទាហានអាមេរិក នេះបើតាមរបាយការណ៍ ដែលបានធ្វើបច្ចុប្បន្នភាពកាលពីថ្ងៃអង្គារសប្តាហ៍មុន។
របាយការណ៍នេះបានបន្ថែមទៀតថា“ ការលំបាកទ្វេភាគីអាចលេចចេញជាថ្មីលើគោលនយោបាយរបស់កូរ៉េខាងជើង រដ្ឋាភិបាលរបស់លោក មូនចេអ៊ីន ជួយបន្ធូរបន្ថយទណ្ឌកម្មប្រឆាំងនឹងក្រុងព្យុងយ៉ាង ដែលជាជំហរមួយដែលអាចបង្កើតភាពតានតឹងជាមួយទីក្រុងវ៉ាស៊ីនតោន”
ទីក្រុងសេអ៊ូល សង្ឃឹមថារដ្ឋបាលថ្មីរបស់សហរដ្ឋអាមេរិក នឹងចាប់ផ្តើមការសន្ទនា ស្តីពីការរំសាយអាវុធនុយក្លេអ៊ែរឡើងវិញយ៉ាងឆាប់រហ័សជាមួយប្រទេសកូរ៉េខាងជើង ដែលបានជាប់គាំងចាប់តាំងពីខែកុម្ភៈ ឆ្នាំ២០១៩ នៅពេលដែលកិច្ចប្រជុំកំពូលអាមេរិកលើកទី២ រវាងលោក ត្រាំ និងលោកគីម ជុងអ៊ុន បានបញ្ចប់ដោយគ្មានកិច្ចព្រមព្រៀង។
ប្រធានាធិបតីកូរ៉េខាងត្បូងលោក មូន ជេអ៊ីន ក៏បានឲ្យដឹងផងដែរថា បញ្ហានៃការធ្វើសមយុទ្ធយោធារួមគ្នារវាងសហរដ្ឋអាមេរិក និងកូរ៉េខាងត្បូងអាចនឹងត្រូវពិភាក្សាជាមួយកូរ៉េខាងជើង ជាមុនបន្ទាប់ពីលោកគីម បានលើកឡើងពីសមយុទ្ធយោធារួមគ្នា ដែលជាភស្តុតាងនៃអ្វីដែលលោកបានអះអាងថា ជាអរិភាពរបស់សហរដ្ឋអាមេរិកចំពោះកូរ៉េខាងជើង៕ ដោយ ឈូក បូរ៉ា
