យ៉ាងហោចណាស់ អ្នកប្រតិបត្តិធម៌ ចំនួន១៨នាក់ ត្រូវបានសម្លាប់ នៅក្នុងពេលផ្ទុះគ្រាប់បែក នៅអាហ្វហ្គានីស្ថាន

អាហ្វហ្គានីស្ថាន៖ ទីភ្នាក់ងារព័ត៌មានចិន ស៊ិនហួ បានចុះផ្សាយ នៅថ្ងៃទី៨ ខែតុលា ឆ្នាំ២០២១ថា អ្នកប្រតិបត្តិធម៌ យ៉ាងហោចណាស់១៨នាក់ ត្រូវបានសម្លាប់ និងជាង៥០នាក់ផ្សេងទៀតបានរងរបួស នៅពេលដែលការបំផ្ទុះគ្រាប់បែក ដែលបានវាយប្រហារមកលើ ព្រះវិហារអ៊ីស្លាម មួយកន្លែង នៅក្នុងកំឡុងពេល អធិស្ឋាននៅថ្ងៃសុក្រនេះ នៅទីក្រុង Kunduz ភាគខាងជើងខេត្ត Kunduz នៃប្រទេសអាហ្វីហ្គានីស្ថាន ។ ប្រភពមួយ បានបញ្ជាក់ឲ្យដឹងដូច្នេះ ។

អ្នកនាំពាក្យតាលីបង់ លោក Zabihullah Mujahid បានសរសេរនៅលើ បណ្តាញសង្គម Twitter ថា “ការផ្ទុះបានកើតឡើងនៅវេលាម៉ោង ២រសៀលម៉ោងក្នុងស្រុក នៅក្នុងព្រះវិហារអ៊ីស្លាម របស់ជនជាតិ Shiite ជាលទ្ធផលអ្នកប្រតិបត្តិធម៌ ជាច្រើននាក់ ត្រូវបានសម្លាប់ និងរងរបួស” ។

កម្លាំងសន្តិសុខតាលីបង់ បានឡោមព័ទ្ធទីតាំងនៅសង្កាត់ Sayyed Abad នៃទីក្រុងដើម្បីមានវិធានការការពារជាមុន ។

អ្នកស្រុកបានឲ្យដឹងថា លក្ខណៈនៃការផ្ទុះនេះអាចជាការផ្ទុះគ្រាប់បែកអត្តឃាត ។

លោក Mujahid បានឲ្យដឹងទៀតថា “កម្លាំងពិសេសរបស់ Mujahideen នៃអេមីរ៉ាតអ៊ីស្លាមអាហ្វហ្កានីស្ថាននៅកន្លែងនោះ។ ពួកគេកំពុងស៊ើបអង្កេតហេតុការណ៍នេះ” ។

ទន្ទឹមនឹងនេះដែរ លោក Maulvi Haqnawaz អនុប្រធានការិយាល័យសុខាភិបាលខេត្តបានប្រាប់ស៊ិនហួ ថាមនុស្ស១៨ នាក់បានស្លាប់ និងជាង៥០នាក់ទៀតរងរបួស ។ លោកបានលើកឡើងថា ចំនួនអ្នកស្លាប់ និងរបួសអាចនឹងកើនឡើងបន្ថែមទៀត ។

មិនទាន់ មានក្រុមណាមួយអះអាងទទួលខុស ត្រូវចំពោះការវាយប្រហារនេះ នៅឡើយទេ ៕

ដោយ៖ ម៉ៅ បុប្ផាមករា