វ៉ាស៊ីនតោន៖ វ៉ាក់សាំងការពារជំងឺកូវីដ-១៩ របស់ក្រុមហ៊ុន Moderna បានទទួលការយល់ព្រមពេញលេញ ពីរដ្ឋបាលចំណីអាហារ និងឱសថសហរដ្ឋអាមេរិក (FDA)។ វ៉ាក់សាំងនេះមានឈ្មោះថា Spikevax ត្រូវបានអនុញ្ញាតឱ្យប្រើលើមនុស្ស អាយុចាប់ពី ១៨ ឆ្នាំឡើងទៅ។
ទីភ្នាក់ងារនេះបានឲ្យដឹង នៅក្នុងសេចក្តីថ្លែងការណ៍មួយថា វ៉ាក់សាំង Spikeax បំពេញតាមស្តង់ដារ យ៉ាងម៉ត់ចត់របស់ FDA សម្រាប់សុវត្ថិភាព ប្រសិទ្ធភាព និងគុណភាពនៃការផលិត ដែលត្រូវការសម្រាប់ការអនុម័ត។
លោកស្រី Janet Woodcock ស្នងការស្តីទីរបស់ FDA បានលើកឡើងថា “ខណៈពេលដែលមនុស្សរាប់លាននាក់ បានទទួលវ៉ាក់សាំងជំងឺកូវីដ-១៩ ដោយសុវត្ថិភាពរួចហើយ យើងទទួលស្គាល់ថាសម្រាប់អ្នកខ្លះ ការយល់ព្រមពី FDA លើវ៉ាក់សាំងឥឡូវនេះអាចបង្កើនទំនុកចិត្តបន្ថែមក្នុងការទទួលថ្នាំបង្ការ” ។
លោកបានបន្ដថា “ព្រឹត្តិការណ៍សំខាន់នាពេលបច្ចុប្បន្ននេះ ធ្វើឱ្យយើងកាន់តែខិតទៅជិតមួយជំហាន ដើម្បីផ្លាស់ប្តូរដំណើរនៃជំងឺរាតត្បាតនេះនៅក្នុងសហរដ្ឋអាមេរិក” នេះបើយោងតាមការចុះផ្សាយ របស់ទីភ្នាក់ងារសារព័ត៌មានចិនស៊ិនហួ។
វ៉ាក់សាំងការពារជំងឺកូវីដ-១៩ របស់ក្រុមហ៊ុន Moderna គឺជាវ៉ាក់សាំងទី២ នៅសហរដ្ឋអាមេរិក ដែលទទួលបានការយល់ព្រមពេញលេញពី FDA ។ វ៉ាក់សាំងកូវីដ-១៩ របស់ក្រុមហ៊ុន Pfizer ឈ្មោះ Comirnaty ត្រូវបានអនុម័តទាំងស្រុងសម្រាប់ប្រើប្រាស់លើមនុស្សដែលមានអាយុចាប់ពី ១៦ ឆ្នាំឡើងទៅក្នុងខែសីហា ឆ្នាំ២០២១។
វ៉ាក់សាំងការពារជំងឺកូវីដ-១៩ របស់ក្រុមហ៊ុន Moderna មាននៅក្រោមការអនុញ្ញាតប្រើប្រាស់ ជាបន្ទាន់របស់ FDA សម្រាប់បុគ្គលដែលមានអាយុចាប់ពី ១៨ ឆ្នាំឡើងទៅ ចាប់តាំងពីថ្ងៃទី១៨ ខែធ្នូ ឆ្នាំ២០២០ មក៕ ដោយ ឈូក បូរ៉ា
