អ៊ីរ៉ង់ កំពុងសម្លឹងមើលចំណែកទីផ្សារ ថាមពលដោយស្មើភាព ខណៈបើមានកិច្ចព្រមព្រៀងនុយក្លេអ៊ែរថ្មី ក្នុងកិច្ចចរចាទីក្រុងវីយែន

តេអេរ៉ង់៖ បន្ទាប់ពីមានការលំបាកជាង ៣ឆ្នាំមក អ៊ីរ៉ង់កំពុងរៀបចំ ដើម្បីទទួលបានចំណែក យុត្តិធម៌របស់ខ្លួននៅក្នុងទីផ្សារប្រេង និងឧស្ម័ន ជាមួយនឹងក្តីសង្ឃឹមនៃការឈានដល់ កិច្ចព្រមព្រៀងនុយក្លេអ៊ែរថ្មីជាមួយ មហាអំណាចពិភពលោក នៅទីក្រុងវីយែន។

អ៊ីរ៉ង់មានផែនការសម្រាប់យុគសម័យ ក្រោយការដាក់ទណ្ឌកម្មក្នុងការ វិនិយោគក្នុងឧស្សាហកម្ម ថាមពលរបស់ខ្លួន ដោយការបើករោងចក្រចម្រាញ់ប្រេងថ្មី ការសាងសង់បំពង់បង្ហូរប្រេងថ្មី និងការពង្រឹងទំនាក់ទំនងអន្តរជាតិ ដើម្បីពង្រីកឱកាសសេដ្ឋកិច្ច។

កាលពីថ្ងៃព្រហស្បតិ៍ រដ្ឋមន្ត្រីប្រេងអ៊ីរ៉ង់ លោក Javad Owji បានលើកឡើងថា ប្រទេសរបស់លោក “បានត្រៀមខ្លួនរួចរាល់ហើយ” ដើម្បីស្តារការផលិត និងការនាំចេញប្រេងរបស់ខ្លួន ដល់កម្រិតមុនការដាក់ទណ្ឌកម្ម របស់សហរដ្ឋអាមេរិកក្នុងខែវិច្ឆិកា ឆ្នាំ២០១៨ ក្នុងករណីដែលការចរចានៅរដ្ឋធានីអូទ្រីស គួរតែបញ្ចប់ដោយ កិច្ចព្រមព្រៀងនុយក្លេអ៊ែរ ដែលអាចកើតមាន ។

លោក Owji បានកត់សម្គាល់ថា “អ៊ីរ៉ង់មានបច្ចេកទេស និងប្រតិបត្តិការអាចរក្សាស្ថិរភាពចំណែក នៃការនាំចេញរបស់ខ្លួននៅក្នុងទីផ្សារ ពិភពលោកបន្ទាប់ពីការដកទណ្ឌកម្ម” ។

ការនាំចេញប្រេងឆៅ និង condensate របស់អ៊ីរ៉ង់ បានធ្លាក់ចុះពីប្រហែល ២,៥លានបារ៉ែលក្នុងមួយថ្ងៃ (bpd) មកនៅខាងក្រោម ១លានបារ៉ែលក្នុងមួយថ្ងៃ បន្ទាប់ពីអតីតរដ្ឋាភិបាលសហរដ្ឋអាមេរិក បានដកខ្លួនចេញពី កិច្ចព្រមព្រៀងនុយក្លេអ៊ែរឆ្នាំ២០១៥ ដែលត្រូវបានគេស្គាល់ជាផ្លូវការថា ជាផែនការសកម្មភាពទូលំទូលាយរួម (JCPOA) និងការដាក់ទណ្ឌកម្មឡើងវិញ លើប្រទេសអ៊ីរ៉ង់ក្នុងឆ្នាំ២០១៨៕

ប្រែសម្រួល ឈូក បូរ៉ា