កងកម្លាំងរុស្ស៊ី វាយប្រហាររោងចក្រ ចម្រាញ់ប្រេង ដ៏សំខាន់ នៅកណ្តាលអ៊ុយក្រែន

ម៉ូស្គូ ៖ ប្រមុខរដ្ឋបាលយោធា-ស៊ីវិល ក្នុងតំបន់ Poltava លោក Dmytro Lunin បានឲ្យដឹងថា កងកម្លាំងរុស្ស៊ី បានធ្វើការវាយប្រហារ ដោយគ្រាប់រ៉ុក្កែត ទៅលើរោងចក្រចម្រាញ់ប្រេង ដ៏សំខាន់មួយនៅក្នុងទីក្រុង Kremenchuk ក្នុងតំបន់ Poltava ភាគកណ្តាល របស់ប្រទេសអ៊ុយក្រែន កាលពីថ្ងៃព្រហស្បតិ៍ ។

លោក Lunin បានសរសេរ នៅលើបណ្ដាញ Telegram ឲ្យដឹងថា “ការបាញ់ផ្លោងនៃតំបន់ Poltava នាពេលបច្ចុប្បន្ននេះ ប្រហែលជាធំបំផុត ក្នុងកំឡុងសង្គ្រាមពេញលេញ” ។

លោក Lunin បានលើកឡើងថា គ្រាប់រ៉ុក្កែតចំនួន ១២ គ្រាប់បានវាយប្រហារទៅលើហេដ្ឋារចនា សម្ព័ន្ធនៅក្នុងទីក្រុង Kremenchuk ដោយភាគច្រើន នៃពួកគេបានវាយប្រហារ ទៅលើរោងចក្រចម្រាញ់ប្រេង។

លោក Lunin បានបន្ដថា ការវាយប្រហារនេះ បណ្តាលឱ្យមានការឆេះនៅរោងចក្រចម្រាញ់ប្រេង ដោយបន្ថែមថា មិនមានអ្នករងរបួស នៅក្នុងការបាញ់ផ្លោងនោះទេ។

យោងតាមប្រព័ន្ធផ្សព្វផ្សាយ ក្នុងស្រុក រោងចក្រចម្រាញ់ប្រេង Kremenchuk ដែលមានសមត្ថភាពរចនា ១៨,៦លានតោន គឺជារោងចក្រចម្រាញ់ប្រេង ដ៏ធំបំផុតនៅអ៊ុយក្រែន៕

ប្រែសម្រួល ឈូក បូរ៉ា