ប្រធានាធិបតីអ៊ុយក្រែន៖ ពេលនេះ យើងមានទាហាន ៧០០ ០០០នាក់ កំពុងប្រយុទ្ធជាមួយរុស្ស៊ី

បរទេស៖ ប្រធានាធិបតីអ៊ុយក្រែន លោក Volodymyr Zelensky បានអះអាងថា ទំហំនៃកម្លាំងយោធាអ៊ុយក្រែន ឥឡូវនេះមានទំហំធំជាងស្ទើរតែ៦ដង កាលពីដើមនៃជម្លោះរវាងទីក្រុងគៀវ និងទីក្រុងម៉ូស្គូ។

យោងតាមសារព័ត៌មាន RT ចេញផ្សាយនៅថ្ងៃទី២១ ខែឧសភា ឆ្នាំ២០២២ បានឱ្យដឹងដោយផ្អែកតាមការលើកឡើង របស់លោក Zelensky ជាមួយទូរទស្សន៍ប៉ុស្តិ៍លេខ 24 កាលពីថ្ងៃសុក្រថា “យើងត្រូវការកងទ័ពច្រើនជាង 250 000នាក់ ឬ 260 000នាក់ ប៉ុន្តែមានកងទ័ពត្រៀមប្រយុទ្ធ ប្រហែល 120 000នាក់” ប៉ុណ្ណោះនៅក្នុងអ៊ុយក្រែន មុនពេលចាប់ផ្តើមប្រតិបត្តិការយោធារុស្ស៊ី នៅចុងខែកុម្ភៈ ។

លោកប្រធានាធិបតីបានកត់សម្គាល់ថា លោកបានចេញបញ្ជានៅដើមឆ្នាំ 2022 ដើម្បីបង្កើនចំនួនទាហាន 100 000 នាក់ទៀត “មិនថាយើងមានប្រាក់ឬអត់នោះទេ” ។ ប៉ុន្តែលោកបានទទួលស្គាល់ថា សូម្បីតែចំនួនទាំងនោះ ក៏មិនគ្រប់គ្រាន់ដើម្បីបញ្ឈប់យោធារុស្ស៊ី នោះដែរ។

លោក Volodymyr Zelensky បន្ថែមថា “ថ្ងៃនេះ យើងមានទាហាន 700 000នាក់ ។ ឥឡូវនេះអ្នកឃើញលទ្ធផលនៃការងាររបស់ 700 000នាក់ ដែលកំពុងប្រយុទ្ធ៕ ប្រែសម្រួលៈ ណៃ តុលា