ខាធូម៖ ទីភ្នាក់ងារព័ត៌មានចិនស៊ិនហួ បានផ្សព្វផ្សាយនៅថ្ងៃទី១៥ ខែសីហា ឆ្នាំ២០២២ថា អាជ្ញាធរបានឲ្យដឹងកាលពីថ្ងៃអាទិត្យថា យ៉ាងហោចណាស់មនុស្សចំនួន៥២នាក់បានស្លាប់ និង២៥នាក់រងរបួស ក្នុងអំឡុងពេលមានភ្លៀងធ្លាក់ខ្លាំងនៅទូទាំងប្រទេសស៊ូដង់ ។
ក្រុមប្រឹក្សាជាតិសម្រាប់ការពារជនស៊ីវិលបាននិយាយនៅលើគេហទំព័ររបស់ខ្លួនថា ក្នុងចំណោមជនរងគ្រោះមាន១៩នាក់ត្រូវបានរាយការណ៍នៅក្នុងរដ្ឋ North Kordofan នៅកណ្តាលប្រទេសស៊ូដង់ ។
ទន្ទឹមនឹងនេះដែរ ផ្ទៃដីកសិកម្មចំនួន២១៩ហិកតា ត្រូវបានជន់លិច ផ្ទះចំនួន៥.៣៤៥ ខ្នងត្រូវបានបំផ្លាញ និង២.៨៦២ខ្នងរងការខូចខាតក្នុងរដូវវស្សាបច្ចុប្បន្ននៅទូទាំងប្រទេស ។ នេះបើយោងតាមក្រុមប្រឹក្សាជាតិបានឲ្យដឹងដូច្នេះ ។
រដ្ឋ River Nile នៅភាគខាងជើងស្ថិតក្នុងចំណោមប្រទេសដែលរងផលប៉ះពាល់ខ្លាំងជាងគេ ដោយផ្ទះសរុបចំនួន២.៧៣២ ខ្នងត្រូវបានបំផ្លាញ និងប្រហែល៦៩០ខ្នងរងការខូចខាត ។
លោក Abdul-Jalil Abdul-Rahim អ្នកនាំពាក្យក្រុមប្រឹក្សា បានជំរុញឱ្យពលរដ្ឋបញ្ឈប់ការងារសំណង់នៅជិតទន្លេ ឬតាមដងអូរ ហើយធ្វើតាមការណែនាំជាផ្លូវការ ។
ប៉ូលិសស៊ូដង់ការពារស៊ីវិលបានឲ្យដឹងថា ក្បួនរថយន្តដែលផ្ទុកសម្ភារៈស្នាក់នៅ រួមទាំង ភួយ តង់ និងម៉ាស៊ីនបូមទឹក ត្រូវបានបញ្ជូនទៅរដ្ឋ River Nile និងរដ្ឋដែលរងផលប៉ះពាល់នៅភាគខាងលិចនៃប្រទេសស៊ូដង់ ។
ការព្រមានអំពីភ្លៀងធ្លាក់ខ្លាំងបន្ថែមទៀតនៅក្នុងប្រទេសស៊ូដង់ដ៏ច្រើនសន្ធឹកសន្ធាប់នៅក្នុងសប្តាហ៍នេះ ខណៈដែលពពក កំពុងផ្លាស់ប្តូរពីខ្ពង់រាបអេត្យូពីនៅភាគខាងកើត ។ លោក Awad Ibrahim អ្នកឧតុនិយមក្នុងតំបន់ ជំរុញឱ្យប្រជាជនមានការប្រុងប្រយ័ត្នខ្ពស់ ។
គួរបញ្ជាក់ថា ស៊ូដង់ ជាញឹកញាប់ត្រូវបានគេមើលឃើញពីគ្រោះទឹកជំនន់ដែលបណ្តាលមកពីភ្លៀងធ្លាក់ខ្លាំងពីខែមិថុនាដល់ខែតុលា ៕ ប្រែសម្រួលដោយ៖ ម៉ៅ បុប្ផាមករា
