បរទេស៖ កងទ័ពរបស់ប្រទេសឆេក បានដាក់ពង្រាយទាហានជាង ៣០០នាក់ ទៅកាន់ព្រំដែនជាមួយប្រទេសស្លូវ៉ាគី ក្នុងកិច្ចប្រឹងប្រែងមួយ ដើម្បីដោះស្រាយការហូរចូលនៃជនចំណាកស្រុកខុសច្បាប់។ អាជ្ញាធរបានលើកឡើងពីចំនួនមនុស្ស ដែលបានមកដល់ក្នុងប្រទេសនេះ ភាគច្រើនមកពីប្រទេសស៊ីរី។
យោងតាមសារព័ត៌មាន RT ចេញផ្សាយនៅថ្ងៃទី៩ ខែតុលា ឆ្នាំ២០២២ បានឱ្យដឹងថា យោងតាមសេចក្តីថ្លែងការណ៍របស់យោធា ចាប់ផ្តើមពីថ្ងៃអាទិត្យ និងរហូតដល់វិធានការការពារព្រំដែនបណ្តោះអាសន្ននៅតែមាន ពួកគេនឹងជួយដល់ការអនុវត្តច្បាប់នៅក្នុងតំបន់ South Moravian, Zlin និង Moravian-Silesian ក្នុងការធ្វើការត្រួតពិនិត្យព្រំដែន។
យោធាបានបន្ថែមទៀតថា “ទាហានសរុបចំនួន ៣២០ នាក់នៃកងកម្លាំងប្រដាប់អាវុធនៃសាធារណរដ្ឋឆេក នឹងត្រូវបានរៀបចំដែលនឹងត្រូវបានដាក់ពង្រាយជា ៤ វេន។ ទាំងនេះគឺជាទាហានមកពីអង្គភាពកងកម្លាំងជើងគោក ដែលនឹងត្រូវបានបំពេញបន្ថែមដោយសមាជិកនៃបម្រុងសកម្ម។ ទាហាននឹងបំពេញភារកិច្ចក្នុងការល្បាតរួម។
ការគ្រប់គ្រងព្រំដែនបណ្តោះអាសន្នត្រូវបានដាក់ឡើងវិញដោយទីក្រុង Prague នៅចុងខែកញ្ញា ចំពេលមានការកើនឡើងនៃចំនួនជនចំណាកស្រុក ដែលភាគច្រើនជាជនជាតិស៊ីរី ដែលភាគច្រើនមកពីប្រទេសតួកគី។ កាលពីដើមសប្តាហ៍នេះ រដ្ឋាភិបាលបានប្រកាសបន្តវិធានការសន្តិសុខនៅតាមព្រំដែនរយៈពេល ២០ថ្ងៃទៀតរហូតដល់ចុងខែតុលា៕
ប្រែសម្រួល៖ ណៃ តុលា