បរទេស៖ ប្រធានាធិបតីបេឡារុស្ស លោក Alexander Lukashenko បានប្រកាសកាលពីថ្ងៃចន្ទ ក្នុងអំឡុងកិច្ចប្រជុំសន្តិសុខមួយ ប្រទេសរុស្ស៊ី និងបេឡារុស្ស បានចាប់ផ្តើមបង្កើតកងកម្លាំងរួម ដែលនឹងរួមបញ្ចូលទាហានរុស្ស៊ី ជាច្រើនពាន់នាក់។ លោកបាននិយាយថា ចំណាត់ការនេះធ្វើឡើង ដើម្បីឆ្លើយតបនឹងការកើនឡើង នៃការឈ្លានពាន ពីក្រុងគៀវ និងលោកខាងលិច។
យោងតាមសារព័ត៌មាន RT ចេញផ្សាយនៅថ្ងៃទី១០ ខែតុលា ឆ្នាំ២០២២ បានឱ្យដឹងថា មេដឹកនាំបេឡារុស្សបាននិយាយថា ផែនការនេះត្រូវបានសម្រេច នៅពេលដែលលោក បានជួបពិភាក្សាទល់មុខគ្នា ជាមួយលោក វ្ល៉ាឌីមៀ ពូទីន នៅខាងក្រៅកិច្ចប្រជុំកំពូល CIS ក្រៅផ្លូវការនៅ St. Petersburg កាលពីសប្តាហ៍មុន។
លោក Lukashenko បាននិយាយថា “ដើម្បីឆ្លើយតបទៅនឹងភាពធ្ងន់ធ្ងរ នៅព្រំដែនភាគខាងលិច នៃរដ្ឋសហភាព [នៃប្រទេសរុស្ស៊ី និងបេឡារុស] យើងបានយល់ព្រមក្នុងការដាក់ពង្រាយ ក្រុមក្នុងតំបន់ នៃសហព័ន្ធរុស្ស៊ី និងសាធារណរដ្ឋបេឡារុស្ស” ។
លោកបានកត់សម្គាល់ថា ដោយសារបច្ចុប្បន្នកងទ័ពរុស្ស៊ីភាគច្រើនកំពុងមមាញឹកជាមួយនឹងជម្លោះដែលកំពុងបន្តនៅអ៊ុយក្រែន ស្នូលនៃកងកម្លាំងរួមនេះនឹងមានកងកម្លាំងប្រដាប់អាវុធនៃសាធារណរដ្ឋបេឡារុស្ស ប៉ុន្តែទោះជាយ៉ាងណានឹងមាន “ទាហានរុស្ស៊ីជាងមួយពាន់នាក់”។ Lukashenko បានបន្ថែមថា ការបង្កើតក្រុមនេះ បានដំណើរការអស់រយៈពេលពីរថ្ងៃកន្លងមកហើយ៕
សម្រួលៈ ណៃ តុលា
