ម៉ូស្គូ ៖ លោក វ្ល៉ាឌីមៀ ពូទីន បានព្រមានអ៊ុយក្រែនថា នឹងមានការឆ្លើយតបយ៉ាងតឹងរ៉ឹង ចំពោះការវាយប្រហារ បន្ថែមទៀត ដូចជាការវាយប្រហារ លើស្ពានតភ្ជាប់គ្រីមៀ និងរុស្ស៊ីជាដើម នេះបើយោងតាមការចុះផ្សាយ របស់ទីភ្នាក់ងារសារព័ត៌មាន The National។
រុស្ស៊ីបានបាញ់ស្រោចមីស៊ីល លើទីក្រុងនានាទូទាំងប្រទេសអ៊ុយក្រែន កាលពីថ្ងៃចន្ទម្សិលមិញនេះ ដើម្បីជាការឆ្លើយតបនឹងអ្វី ដែលប្រធានាធិបតីរុស្ស៊ីរូបនេះ ហៅថាជាអំពើភេរវកម្ម ។
ថ្លែងក្នុងពិធីបើកកិច្ចប្រជុំក្រុមប្រឹក្សា សន្តិសុខរបស់រុស្ស៊ី លោក ពូទីន បានលើកឡើងថា “ការវាយប្រហារដ៏ធំត្រូវបានធ្វើឡើង ជាមួយនឹងអាវុធរយៈចម្ងាយឆ្ងាយ ភាពជាក់លាក់ខ្ពស់ ផ្លូវអាកាស សមុទ្រ និងដីលើថាមពល បញ្ជាការយោធា និងមធ្យោបាយទំនាក់ទំនងរបស់អ៊ុយក្រែន”។
លោកបានបន្ដថា ការវាយប្រហារបន្ថែមណាមួយនឹងត្រូវបានឆ្លើយតបជាមួយនឹងការឆ្លើយតប ដែលនឹង “ឆ្លើយតបទៅនឹងកម្រិតនៃការគំរាមកំហែង ដែលបានបង្កឡើង” ។ ការផ្ទុះបានកក្រើកទីក្រុងជាច្រើន នៅទូទាំងប្រទេសអ៊ុយក្រែន កាលពីថ្ងៃចន្ទម្សិលមិញ។
ប្រមុខយោធាអ៊ុយក្រែនបានឲ្យដឹងថា កងកម្លាំងរុស្ស៊ីបានបាញ់កាំជ្រួច យ៉ាងហោចណាស់ ៧៥ គ្រាប់នៅអ៊ុយក្រែន ដោយមានការវាយប្រហារយ៉ាងធ្ងន់ធ្ងរ ទៅលើរដ្ឋធានីគៀវ ក៏ដូចជាទីក្រុងនានានៅភាគខាងត្បូង និងខាងលិចប្រទេស៕
ប្រែសម្រួល ឈូក បូរ៉ា
