តូក្យូ ៖ នាយករដ្ឋមន្ត្រីអូស្ត្រាលី លោក អាន់តូនី អាល់បានី បានឲ្យដឹងថ្ងៃពុធនេះថា លោកនឹងពិភាក្សា អំពីបញ្ហាសន្តិសុខ ថាមពល និងការប្រែប្រួលអាកាសធាតុ ជាមួយនាយករដ្ឋមន្ត្រីជប៉ុន ហ្វីមីអូ គីស៊ីដា នៅចុងសប្តាហ៍នេះនៅទីក្រុង Perth ។
កិច្ចប្រជុំនៅទីក្រុងរដ្ឋភាគ ខាងលិចប្រទេសអូស្ត្រាលី នៅថ្ងៃសៅរ៍ នឹងប្រព្រឹត្តទៅ ខណៈដែលប្រទេសទាំងពីរ កំពុងបង្កើនកិច្ចសហប្រតិបត្តិការ ផ្នែកសន្តិសុខ ចំពេលមានការកើនឡើង ផ្នែកយោធារបស់ចិន និងមហិច្ឆតាដែនសមុទ្រ។
លោក គីស៊ីដា ដែលនឹងចាប់ផ្តើមដំណើរកម្សាន្តរយៈពេល ៣ថ្ងៃនៅថ្ងៃសុក្រ និងលោក អាល់បានី គ្រោងនឹងចេញសេចក្តីប្រកាសរួម ដែលបញ្ជាក់ពីសារៈសំខាន់នៃ “ឥណ្ឌូប៉ាស៊ីហ្វិកសេរី និងបើកចំហ” នេះបើយោងតាមប្រភពរដ្ឋាភិបាលជប៉ុន។
លោក អាល់បានី បានលើកឡើងថា “ប្រទេសជប៉ុន គឺជាមិត្តជិតស្និទ្ធ និងគួរឱ្យទុកចិត្ត របស់អូស្ត្រាលី។ ភាពជាដៃគូរបស់យើង គឺជាមូលដ្ឋាន សម្រាប់ផលប្រយោជន៍ ជាយុទ្ធសាស្រ្ត និងសេដ្ឋកិច្ចរបស់ប្រទេសទាំងពីរ” ។ “នាយករដ្ឋមន្ត្រីលោក គីស៊ីដា និងខ្ញុំ នឹងពិភាក្សាអំពីវិធីពង្រឹង កិច្ចសហប្រតិបត្តិការរបស់យើង និងសម្រេចបាននូវចក្ខុវិស័យរួម របស់យើងសម្រាប់សន្តិភាព ស្ថិរភាព ធន់នឹងអាកាសធាតុ និងវិបុលភាពឥណ្ឌូប៉ាស៊ីហ្វិក។”
ក្នុងការប្រកាសដំណើរទស្សនកិច្ចរបស់លោក គីស៊ីដា ក្នុងទីក្រុងតូក្យូ ប្រធានខុទ្ទកាល័យលោក Hirokazu Matsuno បានហៅប្រទេសអូស្ត្រាលីថាជា “ដៃគូយុទ្ធសាស្ត្រពិសេស” សម្រាប់ប្រទេសជប៉ុន ដែលចែករំលែកតម្លៃជាមូលដ្ឋាន និងផលប្រយោជន៍យុទ្ធសាស្ត្រ។
អ្នកនាំពាក្យរដ្ឋាភិបាលកំពូលបានឲ្យដឹងថា ប្រទេសជប៉ុន សង្ឃឹមថានឹងពង្រឹងកិច្ចសហប្រតិបត្តិការសន្តិសុខ និងសេដ្ឋកិច្ចជាមួយអូស្ត្រាលី តាមរយៈដំណើរទស្សនកិច្ចរបស់លោក គីស៊ីដា ៕
