ជំនួយការ ប្រធានាធិបតី ចោទវីរៈបុរស អ៊ុយក្រែន ថា ជាជនជាតិអ៊ុយក្រែន ក្លែងក្លាយ

បរទេស៖ ជំនួយការរបស់ ប្រធានាធិបតី Vladimir Zelensky បានប្រាប់ប្រព័ន្ធផ្សព្វផ្សាយក្នុងស្រុកថា ប្រធានក្រុមហ៊ុនផលិតម៉ាស៊ីនយន្តហោះ ដ៏មានកិត្យានុភាព របស់អ៊ុយក្រែន Motor Sich អាចត្រូវបានប្រើប្រាស់ ក្នុងការផ្លាស់ប្តូរអ្នកទោសជាមួយរុស្ស៊ី។ លោក Vyacheslav Boguslaev ត្រូវបានចោទប្រកាន់ពីបទក្បត់ជាតិ ហើយត្រូវបានចាប់ខ្លួនពីបទ លក់ផលិតផល ទៅឱ្យទីក្រុងម៉ូស្គូ។

យោងតាមសារព័ត៌មាន RT ចេញផ្សាយនៅថ្ងៃទី២៥ ខែតុលា ឆ្នាំ២០២២ បានឱ្យដឹងថា តុលាការនៅទីក្រុងគៀវកាលពីថ្ងៃច័ន្ទបានបញ្ជាឱ្យឃុំខ្លួនលោក Boguslaev ដែលមានអាយុ ៨៣ ឆ្នាំ បន្ទាប់ពីទីភ្នាក់ងារសន្តិសុខក្នុងស្រុក (SBU) បានអះអាងថា បុរសរូបនោះបាន លក់គ្រឿងបន្លាស់ និងម៉ាស៊ីនដោយសម្ងាត់ ទៅឱ្យក្រុមហ៊ុន ផលិតឧទ្ធម្ភាគចក្ររុស្ស៊ី។ ធ្វើអត្ថាធិប្បាយលើព័ត៌មាន នៅថ្ងៃដដែលនោះ ជំនួយការ Zelensky គឺលោក Mikhail Podoliak បានស្នើថា បុរសនោះអាចត្រូវបានផ្លាស់ប្តូរ សម្រាប់កងទ័ពដែលចាប់ដោយកងកម្លាំងរុស្ស៊ី។

លោកបាននិយាយថា “យើងនឹងប្រើឱកាសណាមួយ បុគ្គលណាក៏ដោយ … ដើម្បីទទួលបាទាហ៊ានរបស់យើងមកវិញ” ។ លោកបាននិយាយថា លោក Boguslaev ថា ជា ជនជាតិអ៊ុយក្រែន”ក្លែងក្លាយ” មិនដូចទាហានដែលលោកអាចត្រូវបានផ្លាស់ប្តូរនោះទេ។

វិមានក្រឹមឡាំងបានឆ្លើយតបទៅនឹងគំនិតនេះនៅថ្ងៃអង្គារដោយបង្ហាញពីការសង្ស័យអំពីប្រភពរបស់វា។ អ្នកនាំពាក្យការិយាល័យប្រធានាធិបតីរុស្ស៊ី លោក Dmitry Peskov បានប្រាប់អ្នកសារព័ត៌មានថា “តាមដែលយើងដឹង ការិយាល័យប្រធានាធិបតីរុស្ស៊ីមិនដោះស្រាយជាមួយការដោះដូរអ្នកទោសទេ”៕

ប្រែសម្រួលៈ ណៃ តុលា