ការ៉ាកាស៖ រដ្ឋាភិបាលវេណេស៊ុយអេឡា បានរិះគន់ការសម្រេចចិត្តរបស់សហភាពអឺរ៉ុប ក្នុងការបន្តដាក់ទណ្ឌកម្មប្រឆាំងនឹងប្រទេសនៅអាមេរិកខាងត្បូងមួយនេះ រយៈពេលមួយឆ្នាំទៀត នេះបើយោងតាមការចុះផ្សាយរបស់ទីភ្នាក់ងារសារព័ត៌មានចិនស៊ិនហួ។
សេចក្តីថ្លែងការណ៍បានឲ្យដឹងថា “ជាមួយនឹងការសម្រេចចិត្តដ៏អនាធិបតេយ្យនេះ ចេតនាគឺដើម្បីទទូចលើយុទ្ធសាស្ត្រ ដែលមានកំហុសទាំងស្រុង ដែលសហភាពអឺរ៉ុប មិនបានគ្រប់គ្រងដើម្បីសម្រេចគោលបំណងរបស់ខ្លួនក្នុងការផ្តួលរំលំរដ្ឋាភិបាលបូលីវ៉ារៀ ឬបំបែកប្រជាជនរបស់យើងចេញពីផ្លូវនយោបាយ ដែលមានចែងក្នុងរដ្ឋធម្មនុញ្ញរបស់យើង”។
ក្រសួងបានថ្កោលទោសវិធានការនេះថាជាការអនុវត្តដោយខុសច្បាប់ ក្នុងលក្ខណៈដែលបានកំណត់ទុកជាមុនដើម្បី “ដាក់ទណ្ឌកម្ម និងរំលោភសិទ្ធិមនុស្សរបស់ប្រជាជនវេណេស៊ុយអេឡា” ខណៈទណ្ឌកម្មនឹងបញ្ចប់ត្រឹមតែការកំណត់សិទ្ធិទទួលបានអាហារ ឱសថ និងអ្វីដែលជាតម្រូវការផ្សេងទៀត។
សេចក្តីថ្លែងការណ៍បានឲ្យដឹងទៀតថា “យើងបដិសេធចោលនូវគោលនយោបាយ ឆ្កួតលីលាក្នុងការប្រើឧបករណ៍ទាំងនេះនៃពាក្យសំដីនយោបាយ ដែលផ្ទុយនឹងគោលការណ៍ប្រជាធិបតេយ្យ និងសិទ្ធិមនុស្ស ហើយបង្កើតការអនុវត្តប្រកបដោយគ្រោះថ្នាក់ដែលផ្ទុយនឹងគោលការណ៍ច្បាប់អន្តរជាតិ និងការរួមរស់ដោយសន្តិភាព”។
ក្រសួងបានបន្ថែមថា ប្រជាជន និងរដ្ឋាភិបាលវេណេស៊ុយអេឡានឹង “បន្តការពារអធិបតេយ្យភាពរបស់យើង ដោយផ្អែកលើគោលការណ៍រដ្ឋធម្មនុញ្ញរបស់យើង ដោយបញ្ជាក់ឡើងវិញគ្រប់ពេលដែលឯករាជ្យភាពរបស់យើងទទួលបានជាង ២០០ ឆ្នាំមុន” ។
ទណ្ឌកម្មដែលបានដាក់ក្នុងឆ្នាំ២០១៧ បានហាមប្រាមមនុស្សចំនួន ៣៦ នាក់ពីការចូលទៅក្នុងសហភាពអឺរ៉ុប និងដាក់បង្កកទ្រព្យសម្បត្តិរបស់ពួកគេ។ ពួកគេក៏បានដាក់ទណ្ឌកម្មលើអាវុធ និងឧបករណ៍ ដែលអាចប្រើសម្រាប់សកម្មភាពគាបសង្កត់នៅក្នុងប្រទេសផងដែរ៕
ប្រែសម្រួល ឈូក បូរ៉ា
