ប៉េកាំង ៖ ប្រធានក្រុមប្រឹក្សាអឺរ៉ុបលោក Charles Michel នឹងបំពេញទស្សនកិច្ច នៅប្រទេសចិន នៅថ្ងៃព្រហស្បតិ៍ តាមការអញ្ជើញ របស់ប្រធានាធិបតីចិន លោក ស៊ី ជីនពីង ។ ដំណើរទស្សនកិច្ច របស់លោកត្រូវបានគេរំពឹងថា នឹងជំរុញឱ្យមានការរីកចម្រើន ជានិរន្តរភាពនៃទំនាក់ទំនងចិន-សហភាពអឺរ៉ុប ដែលនឹងចាក់បញ្ចូលស្ថិរភាពបន្ថែមទៀត ក្នុងពិភពលោកដ៏ចលាចល និងការផ្លាស់ប្តូរ ។
លោក Michel នឹងក្លាយជាមេដឹកនាំដំបូងគេ នៃស្ថាប័នសហភាពអឺរ៉ុប ដែលមកបំពេញទស្សនកិច្ច នៅប្រទេសនេះបន្ទាប់ពីសមាជជាតិ លើកទី២០ នៃបក្សកុម្មុយនិស្តចិន (CPC) នេះបើយោងតាមការចុះផ្សាយ របស់ទីភ្នាក់ងារសារព័ត៌មានចិនស៊ិនហួ ។
មុនពេលដំណើរទស្សនកិច្ច របស់លោក Michel លោក ស៊ី បានជួបផ្ទាល់ជាមួយមេដឹកនាំជាច្រើន មកពីបណ្តាប្រទេសអឺរ៉ុប រួមទាំងប្រធានាធិបតីបារាំង លោក អេម៉ានុយអែល ម៉ាក្រុង នៅខាងក្រៅកិច្ច ប្រជុំកំពូលលើកទី១៧ នៃក្រុមប្រទេសទាំង២០ នៅពាក់កណ្តាលខែវិច្ឆិកា។ អធិការបតីអាល្លឺម៉ង់លោក Olaf Scholz ក៏បានធ្វើទស្សនកិច្ចនៅប្រទេសចិន កាលពីដើមខែនេះផងដែរ ។
អន្តរកម្មបែបនេះបង្ហាញពីឆន្ទៈ កាន់តែខ្លាំងឡើង រវាងភាគីទាំងពីរក្នុងការអភិវឌ្ឍបន្ថែមទៀត នូវផលប្រយោជន៍រួម និងពង្រឹងមូលដ្ឋានគ្រឹះ សម្រាប់កិច្ចសហប្រតិបត្តិការ ។
ក្នុងប៉ុន្មានឆ្នាំកន្លងទៅ ការសន្ទនា ជាក់ស្តែងរវាងភាគីទាំងពីរទទួលបានលទ្ធផល គួរឲ្យចាប់អារម្មណ៍ ដែលបង្ហាញដោយទំនាក់ទំនង ដ៏រឹងមាំនៃកិច្ចសហប្រតិបត្តិការសេដ្ឋកិច្ច ។
ចាប់ពីខែមករា ដល់ខែតុលា ពាណិជ្ជកម្មទ្វេភាគីបានឈានដល់ ៧១១,៣ ពាន់លានដុល្លារអាមេរិក កើនឡើង ៦,៣ភាគរយពីមួយឆ្នាំទៅមួយឆ្នាំ។ ទិន្នន័យពីក្រសួងពាណិជ្ជកម្មចិន បានបង្ហាញថា ក្នុងរយៈពេល ៨ខែដំបូង លំហូរចូល FDI របស់សហភាពអឺរ៉ុប ទៅកាន់ប្រទេសចិន បានកើនឡើង ១២៣,៧ភាគរយគួរឱ្យភ្ញាក់ផ្អើល ពីមួយឆ្នាំទៅមួយឆ្នាំ៕
ប្រែសម្រួល ឈូក បូរ៉ា
