គៀវ៖ វរសេនីយ៍ទោចូលនិវត្តន៍លោក Alexander Vindman បានឲ្យដឹងថា ប្រទេសរុស្ស៊ី កំពុងតស៊ូជាមួយនឹងការធានានូវភាពជោគជ័យនៅក្នុងប្រទេសអ៊ុយក្រែន ខណៈដែលខ្លួននៅតែបន្តប្រើយុទ្ធសាស្រ្ត “បរាជ័យ” ដើម្បីប្រយុទ្ធប្រឆាំងនឹងកងកម្លាំងអ៊ុយក្រែនក្នុងការឈ្លានពាន ដែលកំពុងបន្ត។
លោក Vindman បានឲ្យដឹងក្នុងអំឡុងបទសម្ភាសន៍មួយនៅលើ The AI Franken Podcast ដែលត្រូវបានបង្ហោះកាលពីថ្ងៃអាទិត្យទៅកាន់បណ្ដាញ Twitter ថា “ជនជាតិរុស្ស៊ី កំពុងព្យាយាមធ្វើអ្វីៗគ្រប់យ៉ាង ដែលពួកគេអាចធ្វើបាន ដើម្បីដណ្តើមយកជ័យជំនះនៅអ៊ុយក្រែន ហើយពួកគេមិនអាចឈ្នះនៅលើសមរភូមិក្នុងប្រទេសអ៊ុយក្រែនបាននោះទេ ព្រោះថា កងកម្លាំងប្រដាប់អាវុធអ៊ុយក្រែន គឺខ្លាំងពេក”។
លោក Vindman បានបន្ថែមថា ប្រធានាធិបតីរុស្ស៊ី លោក វ្លាឌីមៀ ពូទីន នៅតែព្យាយាមសម្រេចបាននូវគោលដៅរបស់ប្រទេសខ្លួនក្នុងប្រទេសអ៊ុយក្រែន ដោយជំរុញប្រឆាំងនឹងប្រជាជនអ៊ុយក្រែន ក្នុងកិច្ចខិតខំប្រឹងប្រែង ដើម្បី “បំបែកឆន្ទៈរបស់ពួកគេក្នុងការប្រយុទ្ធ”។ លោកបានហៅយុទ្ធសាស្ត្រនោះថា “គួរឲ្យខ្លាច” ខណៈដែលជនជាតិអ៊ុយក្រែន នឹងមិនអាចបំបាក់បាន។
វរសេនីយ៍ទោចូលនិវត្តន៍រូបនេះ ដែលធ្លាប់ជាអតីតនាយកកិច្ចការអឺរ៉ុបសម្រាប់ក្រុមប្រឹក្សាសន្តិសុខជាតិសហរដ្ឋអាមេរិកបានបន្ដថា “ប្រជាជនអ៊ុយក្រែននឹងបន្តគាំទ្រយោធារបស់ពួកគេ”។
លោក Vindman បានបន្ថែមទៀតថា មាន “៨៧ ភាគរយ ទៅ ៩០ ភាគរយគាំទ្រ” សម្រាប់ការបន្តរំដោះជនជាតិអ៊ុយក្រែន នៅក្នុងទឹកដីដែលកាន់កាប់ដោយរុស្ស៊ី។ ទោះបីជាលោកមិនបាននិយាយពីប្រភពនៃតួលេខភាគរយក៏ដោយ វាហាក់បីដូចជាលោក កំពុងសំដៅទៅលើការស្ទង់មតិ ដែលធ្វើឡើងដោយវិទ្យាស្ថានសង្គមវិទ្យាអន្តរជាតិគៀវ ដែលបានរកឃើញថា ៨៧ ភាគរយនៃប្រជាជនអ៊ុយក្រែន ប្រឆាំងនឹងគំនិតនៃប្រទេសរបស់ពួកគេក្នុងការផ្តល់ឱ្យទឹកដីណាមួយដោយមិនគិតពីរយៈពេលប៉ុន្មាននោះទេ ហើយសង្គ្រាមនឹងបន្តអូសបន្លាយ៕
