ព័ត៌មានអន្តរជាតិ

អ៊ីរ៉ង់ អំពាវនាវឱ្យមានយន្តការរួមគ្នា ដើម្បីទប់ទល់នឹងទណ្ឌកម្មឯកតោភាគី

តេអេរ៉ង់៖ ទីភ្នាក់ងារព័ត៌មាននិស្សិតអ៊ីរ៉ង់ បានរាយការណ៍ថា មន្ត្រីសន្តិសុខកំពូលអ៊ីរ៉ង់មួយរូបកាលពីថ្ងៃអង្គារបានស្នើឱ្យបង្កើតស្ថាប័ន “រួមគ្នា និងរួមបញ្ចូលគ្នា” ដើម្បីប្រឆាំងនឹងការដាក់ ទណ្ឌកម្មឯកតោភាគី។

ធ្វើការកត់សម្គាល់នៅក្នុងជំនួបជាមួយលោក Igor Levitin ជំនួយការជាន់ខ្ពស់ របស់ប្រធានាធិបតីរុស្ស៊ី លោក វ្លាឌីមៀ ពូទីន ក្នុងប្រទេសអ៊ីរ៉ង់ លេខាធិការ នៃក្រុមប្រឹក្សាសន្តិសុខជាតិកំពូល របស់អ៊ីរ៉ង់លោក Ali Shamkhani បានព្រមានថា ប្រព័ន្ធទណ្ឌកម្មឯកតោភាគី រំខានដល់ការអភិវឌ្ឍន៍ របស់ប្រទេសគោលដៅ និងធ្វើឱ្យវិបត្តិក្នុងតំបន់ និងអន្តរជាតិកាន់តែធ្ងន់ធ្ងរឡើង។

អត្ថាធិប្បាយលើទំនាក់ទំនង ទ្វេភាគី អ៊ីរ៉ង់-រុស្ស៊ីលើគ្រប់វិស័យ លោក Shamkhani បានសង្កត់ធ្ងន់លើតម្រូវការ ក្នុងការអនុវត្តគម្រោងសេដ្ឋកិច្ចរួមគ្នា ក្នុងក្របខ័ណ្ឌនៃកិច្ចព្រមព្រៀង ដែលបានឈានដល់ពីមុន រវាងប្រធានាធិបតីអ៊ីរ៉ង់លោក Ebrahim Raisi និងលោក ពូទីន ។

សម្រាប់ផ្នែករបស់លោកវិញ លោក Levitin បានលើកឡើងថា អាទិភាពចម្បងរបស់រុស្ស៊ី គឺត្រូវចាប់ផ្តើមសាងសង់ផ្លូវដែកក្នុងប្រទេសអ៊ីរ៉ង់យ៉ាងឆាប់រហ័ស ដែលនឹងត្រូវបានបញ្ចូលទៅក្នុងច្រករបៀង ដឹកជញ្ជូនអន្តរជាតិខាងជើង-ខាងត្បូង និងផ្លូវដែក Rasht-Astara ពេញលេញដែលផ្តល់សារៈសំខាន់ ជាយុទ្ធសាស្ត្ររបស់គម្រោងទាំងពីរ ។

លោកបានចង្អុលបង្ហាញពីសមត្ថភាព និងគុណសម្បត្តិពិសេស របស់អ៊ីរ៉ង់នៅក្នុងវិស័យថាមពល និងដឹកជញ្ជូន ដោយបង្ហាញពីឆន្ទៈរបស់ក្រុមហ៊ុន រុស្ស៊ីក្នុងការវិនិយោគដ៏ធំ នៅក្នុងគម្រោងហេដ្ឋារចនាសម្ព័ន្ធ របស់អ៊ីរ៉ង់។

ដោយសង្កត់ធ្ងន់លើកិច្ចព្រមព្រៀង រវាងរុស្ស៊ី និងអ៊ីរ៉ង់លើការអភិវឌ្ឍន៍ពាណិជ្ជកម្មតាមរយៈការប្រើប្រាស់ រូបិយប័ណ្ណជាតិ និងការដោះដូរទំនិញ លោក Levitin បានបន្ថែមថា យន្តការចាំបាច់ត្រូវ បានធ្វើឱ្យសកម្ម សម្រាប់ការដកការរឹតបន្តឹង ដែលបណ្តាលមកពីការដាក់ទណ្ឌកម្ម លើវិស័យធនាគាររបស់ប្រទេសទាំងពីរ ៕

ប្រែសម្រួល ឈូក បូរ៉ា

To Top