ប៊ែរឡាំង៖ អធិការបតីអាល្លឺម៉ង់លោក Olaf Scholz កំពុងស្ថិតនៅក្នុងទីក្រុងប៉ារីស ដើម្បីពិភាក្សាជាមួយប្រធានាធិបតីបារាំង លោក អេម៉ានុយអែល ម៉ាក្រុង កាលពីថ្ងៃអាទិត្យ ខណៈដែលមេដឹកនាំទាំងពីរ ស្វែងរកការយកឈ្នះលើភាពខ្វែងគំនិតគ្នា ដែលបានកើតឡើង ដោយសង្គ្រាមអ៊ុយក្រែន។
មេដឹកនាំអាល្លឺម៉ង់ បានធ្វើទស្សនកិច្ច ទៅរដ្ឋធានីបារាំង សម្រាប់ថ្ងៃនៃពិធីរំលឹកខួប ៦០ឆ្នាំចាប់តាំងពីសន្ធិសញ្ញាសំខាន់មួយ បានផ្សាភ្ជាប់ចំណងរវាងខ្មាំងសត្រូវ ដ៏យូរអង្វែង ដែលគាំទ្រសហភាពអឺរ៉ុបសព្វថ្ងៃ។
គណៈរដ្ឋមន្ត្រីទាំងមូល របស់ប្រទេសអាឡឺម៉ង់គឺនៅទីក្រុងប៉ារីស ហើយសមាជិកសភា ៣០០ នាក់មកពីប្រទេសទាំងពីរបានជួបប្រជុំគ្នានៅសាកលវិទ្យាល័យ Sorbonne ។ មេដឹកនាំទាំងពីរនឹងត្រួតពិនិត្យការចរចាពីរជុំនៅវិមាន Elysee ដោយផ្តោតលើថាមពល និងគោលនយោបាយសេដ្ឋកិច្ច ក៏ដូចជាការការពារជាតិ។
លោក Scholz បានឲ្យដឹងនៅក្នុងពិធីនៅឯសាកលវិទ្យាល័យ Sorbonne ថា “អនុញ្ញាតឱ្យយើងប្រើមិត្តភាព ដែលមិនអាចបំបែកបានរបស់យើង ដើម្បីកំណត់បច្ចុប្បន្ន និងអនាគតនៃទ្វីបរបស់យើង រួមជាមួយដៃគូអឺរ៉ុបរបស់យើង” ។
លោកបានបន្តថា បន្ទាប់ពីរុស្ស៊ីបានឈ្លានពានអ៊ុយក្រែន ក្នុងខែកុម្ភៈឆ្នាំមុន គម្រោងសន្តិភាពអឺរ៉ុបគឺស្ថិតនៅក្នុងចំណុចរបត់មួយ នេះបើយោងតាមការចុះផ្សាយរបស់ទីភ្នាក់ងារសារព័ត៌មានអាល់ហ្សាហ្ស៊ីរ៉ា។
លោកបន្ដថា “ចក្រពត្តិនិយមរបស់លោក ពូទីន នឹងមិនឈ្នះនោះទេ យើងនឹងមិនអនុញ្ញាតឱ្យអឺរ៉ុប ត្រលប់ទៅសម័យកាលដែលអំពើហិង្សា បានជំនួសនយោបាយ ហើយទ្វីបរបស់យើងត្រូវបានហែកហួរដោយភាពស្អប់ខ្ពើម និងការប្រជែងគ្នារបស់ជាតិ”៕
ប្រែសម្រួល ឈូក បូរ៉ា
