បរទេស៖ អគ្គមេបញ្ជាការកងទ័ពរុស្ស៊ី លោកឧត្តមសេនីយ Valery Gerasimov បាននិយាយថា ទីក្រុងមូស្គូមានបំណងបង្កើតតំបន់យោធាថ្មី និងប្រមូលផ្តុំអង្គភាពថ្មីៗ ដើម្បីទប់ទល់នឹងការគម្រាមកំហែងខ្លាំងបំផុត ផ្នែកសន្តិសុខដែលខ្លួនប្រឈមមុខ រួមទាំងសង្រ្គាមកូនកាត់នៅអ៊ុយក្រែន ក៏ដូចជា ប្រទេសហ្វាំងឡង់ និង ស៊ុយអែត ដែលមានសក្តានុពល ចូលរួមជាមួយអង្គការណាតូ។
យោងតាមសារព័ត៌មាន RT ចេញផ្សាយនៅថ្ងៃទី២៤ ខែមករា ឆ្នាំ២០២៣ បានឱ្យដឹងថា និយាយនៅក្នុងបទសម្ភាសន៍មួយនៅក្នុងកាសែត Argumenty i Fakty កាលពីថ្ងៃចន្ទ លោកឧត្តមសេនីយ Gerasimov បាននិយាយថា “នៅពេលនេះ ការគម្រាមកំហែងបែបនេះ គឺជាសេចក្តីប្រាថ្នារបស់អង្គការណាតូ ដើម្បីពង្រីកដោយការបញ្ចូលប្រទេសហ្វាំងឡង់ និងស៊ុយអែត ក៏ដូចជាការប្រើប្រាស់អ៊ុយក្រែន ជាឧបករណ៍សម្រាប់ធ្វើសង្រ្គាមកូនកាត់ ប្រឆាំងនឹងប្រទេសរបស់យើង” ដោយសហរដ្ឋអាមេរិក និងសម្ព័ន្ធមិត្តរបស់ពួកគេ ។
យោងតាមឧត្តមសេនីយ ការឆ្លើយតបរបស់យោធារុស្ស៊ី ចំពោះបញ្ហាប្រឈមទាំងនោះ ក្នុងចំណោមរបស់ផ្សេងទៀត រួមមានការបង្កើតតំបន់យោធា Moscow និង Leningrad និងការបង្កើតកងពលកាំភ្លើងធំចំនួន៣នៅតំបន់ Kherson និង Zaporozhye ដែលបានចូលរួមជាមួយរុស្ស៊ី ក្នុងរដូវស្លឹកឈើជ្រុះបន្ទាប់ពី ការបោះឆ្នោតប្រជាមតិ ក៏ដូចជាសាធារណរដ្ឋ Donetsk និង Lugansk ។ ក្នុងរបៀបវារៈក៏កំពុងដាក់ កងទ័ពនៅសាធារណរដ្ឋ Karelia ដែលស្ថិតនៅភាគពាយ័ព្យរបស់រុស្ស៊ី និងជាប់ព្រំដែនប្រទេសហ្វាំងឡង់ ៕
ប្រែសម្រួលៈ ណៃ តុលា
