វ៉ាស៊ីនតោន៖ ទូរទស្សន៍សិង្ហបុរី Channel News Asia បានផ្សព្វផ្សាយនៅថ្ងៃទី១ ខែកុម្ភៈ ឆ្នាំ២០២៣ថា លោក ចូ បៃដិន ប្រធានាធិបតីសហរដ្ឋអាមេរិក បានថ្លែងកាលពីថ្ងៃអង្គារថា លោកនឹងកំពុងពិភាក្សាជាមួយប្រធានាធិបតី Volodymyr Zelenskyy លើសំណើចុងក្រោយបង្អស់ របស់អ៊ុយក្រែន សម្រាប់អាវុធទំនើបៗ ដើម្បីការពារប្រឆាំងនឹងរុស្ស៊ី ។
លោក បៃដិន បានប្រាប់ដល់អ្នកយកព័ត៌មាននៅពេលព្រឹកបន្ទាប់ ពីគាត់បានឆ្លើយដោយសង្កត់ធ្ងន់ថា “ទេ” នៅគ្រាដែលមានមានការសួរនៅសេតវិមាន ថាតើ គាត់ពេញចិត្តក្នុងការបញ្ជូនយន្តហោះចម្បាំង F-16 ទៅកាន់អ៊ុយក្រែនដែរឬទេ ។
គេបានដឹងថា រហូតមកដល់ពេលនេះ សហរដ្ឋអាមេរិក គឺជាអ្នកផ្គត់ផ្គង់អាវុធដ៏ធំបំផុត ដល់អ៊ុយក្រែន ដែលការឈ្លានពានរបស់រុស្ស៊ីឥឡូវនេះកំពុងខិតជិតដល់រយៈពេល១ឆ្នាំហើយ ។ សម្ព័ន្ធនៃបណ្តាប្រទេសលោកខាងលិចផ្សេងទៀត ក៏កំពុងបញ្ជូនអាវុធផងដែរ ចាប់ពីកាំភ្លើងរហូតដល់រថពាសដែក និងកាំភ្លើងធំ ។
ទោះបីជាយ៉ាងណាក៏ដោយ ដោយសាររុស្ស៊ី មិនបង្ហាញសញ្ញានៃការបណ្តោយខ្លួនក្នុងការបំផ្លាញប្រទេសជិតខាងអ៊ុយក្រែនរបស់ខ្លួន លោក Zelenskyy បាននឹងកំពុងចេញការអំពាវនាវឱ្យមានអាវុធដ៏មានឥទ្ធិពល និងទំនើបជាងមុន ។
កាលពីពេលថ្មីៗនេះ សហរដ្ឋអាមេរិក និងអាល្លឺម៉ង់ បានព្រមព្រៀងគ្នាក្នុងការបញ្ជូនរថពាសដែកទំនើបៗទៅតាមការដឹកនាំមុនរបស់អង់គ្លេស ៕
ដោយ៖ ម៉ៅ បុប្ផាមករា