បរទេស៖ ក្រុមឃ្លាំមើលឧក្រិដ្ឋកម្មហិរញ្ញវត្ថុអន្តរជាតិ ក្រុមការងារសកម្មភាពហិរញ្ញវត្ថុ (FATF) បាននិយាយនៅថ្ងៃសុក្រថា ខ្លួនបានដកប្រទេសម៉ារ៉ុក និងកម្ពុជាចេញពីប្រទេសដែលហៅថា “បញ្ជីប្រផេះ” នៃបណ្តាប្រទេសដែលស្ថិតក្រោមការត្រួតពិនិត្យពិសេសដើម្បីអនុវត្តស្តង់ដារដើម្បីការពារការលាងលុយកខ្វក់ និងហិរញ្ញប្បទានភេរវកម្ម។
យោងតាម Middle East Online ចេញផ្សាយនៅថ្ងៃទី២៤ ខែកុម្ភៈ ឆ្នាំ២០២៣ បានឱ្យដឹងថា FATF គឺជាអង្គការអន្តររដ្ឋាភិបាលដែលគាំទ្រការប្រយុទ្ធប្រឆាំងនឹងការលាងលុយកខ្វក់ និងហិរញ្ញប្បទានភេរវកម្ម ដោយកំណត់ស្តង់ដារពិភពលោក និងពិនិត្យមើលថាតើប្រទេសនានាគោរពដែរឬទេ។
ប្រទេសម៉ារ៉ុក និងកម្ពុជា លែងជាកម្មវត្ថុនៃការត្រួតពិនិត្យបន្ថែមទៀតដោយ FATF ទៀតហើយ, នេះបើតាមរបាយការណ៍របស់អង្គការឃ្លាំមើល។
សូមជម្រាបថា កាលពីនៅក្រោយបញ្ចប់កិច្ចប្រជុំលើកទី៥ របស់ គ.ស.ហ នាថ្ងៃទី១៧ ខែវិច្ឆិកា ឆ្នាំ២០២២ នៅសណ្ឋាគារសុខា សម្ដេចក្រឡាហោម ស ខេង ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ បានបង្ហាញសង្ឃឹមថា កម្ពុជា អាចនឹងដកខ្លួនចេញបញ្ជីប្រផេះ នាដើមឆ្នាំ២០២៣ ដោយសារតែឆន្ទៈនយោបាយ របស់រាជរដ្ឋាភិបាលកម្ពុជា ក្នុងការប្រយុទ្ធប្រឆាំងការសម្អាតប្រាក់ ។ ការលើកឡើងរបស់ សម្ដេច ស ខេង បែបនេះក្រោយពី ក្រុមការងារហិរញ្ញវត្ថុ ហៅកាត់ថា (FATF) មានមូលដ្ឋាន នៅទីក្រុងប៉ារីស កាលពីថ្ងៃទី៤ ខែមីនា ឆ្នាំ២០២២ បានសម្រេចបន្តដាក់កម្ពុជាឲ្យស្ថិតក្នុង «បញ្ជីប្រផេះ» នៃក្រុមប្រទេស ដែលមានហានិភ័យខាងលាងលុយកខ្វក់ ដែលពិភពលោកត្រូវបង្កើន ការតាមដានក្នុងឆ្នាំនេះ។ បញ្ជីប្រផេះ មានន័យថា កម្ពុជានៅតែស្ថិតក្នុងចំណោមប្រទេស មានហានិភ័យលើការលាងលុយកខ្វក់។
សម្ដេចក្រឡាហោម ស ខេង បានឱ្យដឹងថា គោលនយោបាយរបស់រាជរដ្ឋាភិបាលកម្ពុជា បានខិតខំប្រឹងប្រែង ក្នុងការប្រយុទ្ធប្រឆាំងការសម្អាតប្រាក់។
សម្ដេចក្រឡាហោម មានប្រសាសន៍ថា «ដោយសាររបាយការណ៍ចុងក្រោយ គឺអង្គការ FATF បានទទួលស្គាល់ ហើយអង្គការ FATF នឹងចាត់តាំងក្រុមការងារដើម្បីចុះមក On-site Visit ហើយការប្រជុំរបស់យើងថ្ងៃនេះ គឺជាការប្រជុំដើម្បីត្រៀមរៀបចំ ទទួលស្វាគមន៍ការចុះធ្វើ On-site Visit នេះ នៅខែមករា ឆ្នាំ២០២៣។
បើតាមសម្តេចក្រឡាហោម នេះជាក្ដីសង្ឃឹម របស់យើង យើងសង្ឃឹមថា អាចនឹងដកខ្លួនចេញបញ្ជីប្រផេះឱ្យបាន ដោយសារតែឆន្ទៈនយោបាយ របស់រាជរដ្ឋាភិបាល ហើយក៏ដូចជា កិច្ចខិតខំប្រឹងប្រែងពីគ្រប់ក្រសួង-ស្ថានប័ន្ធ ដែលមានការពាក់ព័ន្ធ ក្នុងការប្រយុទ្ធប្រឆាំងការសម្អាតប្រាក់» ៕ប្រែសម្រួលៈ ណៃ តុលា
