វ៉ាស៊ីនតោន ៖ រដ្ឋមន្ត្រីការបរទេសអាមេរិក លោក Antony Blinken បានព្រមានសហគមន៍អន្តរជាតិ កុំឱ្យមានការភ័ន្តច្រឡំ ដោយរុស្ស៊ី និងចិន ជុំវិញសង្គ្រាមអ៊ុយក្រែន ខណៈដែលប្រធានាធិបតីចិន ស៊ី ជីនពីង បានចាប់ផ្តើមដំណើរទស្សនកិច្ច ផ្លូវរដ្ឋដ៏ល្បីនៅទីក្រុងមូស្គូ ។
លោក Blinken បានលើកឡើងថា ផែនការណាមួយ សម្រាប់ការបញ្ចប់សង្រ្គាម ត្រូវតែរក្សាអធិបតេយ្យភាព និងបូរណភាពទឹកដីរបស់អ៊ុយក្រែន ស្របតាមធម្មនុញ្ញ អង្គការសហប្រជាជាតិ ។ អ្នកការទូតកំពូល របស់សហរដ្ឋអាមេរិករូបនេះបានលើកឡើងថា កិច្ចខិតខំប្រឹងប្រែង ដែលខ្វះការផ្តល់ជូនបែបនេះ គឺគ្រាន់តែស្វែងរកការលើកកម្ពស់ “លទ្ធផលដ៏អយុត្តិធម៌” ប៉ុណ្ណោះ។
ភ្លាមៗបន្ទាប់ពីប្រធានាធិបតីរុស្ស៊ី លោក វ្ល៉ាឌីមៀ ពូទីន បានស្វាគមន៍លោក ស៊ី ជីនពីង យ៉ាងកក់ក្តៅថា “ពិភពលោកមិនគួរត្រូវបានបោក បញ្ឆោតដោយចលនាយុទ្ធសាស្ត្រណាមួយ ដោយរុស្ស៊ី ដែលគាំទ្រ ដោយប្រទេសចិន ឬប្រទេសណាមួយផ្សេងទៀត ដើម្បីបង្កកសង្រ្គាមដោយខ្លួនឯងនោះទេ” ។
លោក Blinken ក៏បានគូស បញ្ជាក់ផងដែរថា ដំណើរទស្សនកិច្ចរយៈពេល ៣ថ្ងៃរបស់លោក ស៊ី ទៅកាន់រដ្ឋធានីរុស្ស៊ី ដែលធ្វើឡើងតែប៉ុន្មានថ្ងៃ បន្ទាប់ពីការចេញដីកាចាប់ខ្លួនលោក ពូទីន ដោយតុលាការ ឧក្រិដ្ឋកម្មអន្តរជាតិ បង្ហាញសញ្ញាថាទីក្រុងប៉េកាំង មានអារម្មណ៍ថាគ្មានការ ទទួលខុសត្រូវក្នុងការឲ្យវិមានក្រឹមឡាំង ទទួលខុសត្រូវ ចំពោះអំពើឃោរឃៅ ដែលបានប្រព្រឹត្តនៅក្នុង ប្រទេសអ៊ុយក្រែន”។
ការអត្ថាធិប្បាយនេះត្រូវបានធ្វើឡើង ខណៈដែលរដ្ឋបាលរបស់លោកប្រធានាធិបតី ចូ បៃដិន បានលើកឡើងនូវការព្រួយបារម្ភអំពីលទ្ធភាពដែលលោក ស៊ី បង្ហាញខ្លួនជាឈ្មួញកណ្តាលសន្តិភាព និងអំពាវនាវឱ្យមានបទឈប់បាញ់រវាងរុស្ស៊ី និងអ៊ុយក្រែន។
លោក Blinken បានបន្ថែមថា សំណើបែបនេះដែលធ្វើឡើងដោយប្រទេសចិន កាលពីខែមុននឹងមិនមែនជា “ដំណោះស្រាយយូរអង្វែង” នោះទេ។ លោកបានអះអាងថា វានឹងអាចឱ្យលោក ពូទីន ស្តារឡើងវិញនូវយោធារុស្ស៊ី ហើយ “បន្ទាប់មកចាប់ផ្តើមសង្រ្គាមឡើងវិញ នៅពេលមានអត្ថប្រយោជន៍ជាង” សម្រាប់ប្រទេសរបស់លោក ៕
ប្រែសម្រួល ឈូក បូរ៉ា
