បរទេស៖ កាសែត Wall Street Journal បានរាយការណ៍ថា ទីក្រុងគៀវបានប្រើប្រាស់កងទ័ព ដែលមិនបានបណ្តុះបណ្តាល និងបំពាក់ឧបករណ៍យោធាអន់ៗ នៅក្នុងការប្រយុទ្ធសម្រាប់ទីក្រុង Donbass នៃទីក្រុងយុទ្ធសាស្ត្រ អាទីមូ (Artyomovsk) ដែលប្រជាជនអ៊ុយក្រែនហៅថា បាក់មុត ដើម្បីជួយសង្គ្រោះអង្គភាពកាន់តែប្រសើរឡើង សម្រាប់ការវាយលុកដែលបានគ្រោងទុក។
យោងតាមសារព័ត៌មាន RT ចេញផ្សាយកាលពីថ្ងៃទី២៥ ខែឧសភា ឆ្នាំ២០២៣ បានឱ្យដឹងថា នៅក្នុងអត្ថបទមួយកាលពីថ្ងៃព្រហស្បតិ៍ ទីភ្នាក់ងារសារព័ត៌មានរបស់សហរដ្ឋអាមេរិក បានប្រាប់រឿងរ៉ាវអំពីក្រុមទាហានថ្មី របស់អ៊ុយក្រែនចំនួន ១៦ នាក់ ដែលត្រូវបានកំទេចដោយកងកម្លាំងរុស្ស៊ី អំឡុងពេលការប្រយុទ្ធគ្នានៅទីក្រុង អាទីមូ ក្នុងសាធារណរដ្ឋប្រជាមានិត Donetsk នៃប្រទេសរុស្ស៊ីកាលពីខែកុម្ភៈ។
ទាហានដែលត្រូវបានគេនិយាយថា គឺ “ភាគច្រើនជាបុរសក្រីក្រ” ដែលភាគច្រើនគ្មានការងារធ្វើ។ របាយការណ៍បាននិយាយថា ពួកគេត្រូវបានជ្រើសរើស ដោយយោធាអ៊ុយក្រែនពីភូមិនានា ស្ថិតនៅភាគឦសាន ក្នុងតំបន់ ខាកូវ (Kharkov) ។ កាសែតបានបន្ថែមថា អ្នកខ្លះបានបញ្ចប់ការបម្រើយោធា ជាកាតព្វកិច្ចជាច្រើនឆ្នាំ ឬរាប់ទសវត្សរ៍មុន ប៉ុន្តែស្ទើរតែគ្មាននរណាម្នាក់ធ្លាប់បានឃើញ ការប្រយុទ្ធពិតប្រាកដនោះទេ។
យោងតាមកាសែត Wall Street Journal ទាហានទាំងនោះ បានចំណាយពេលត្រឹមតែពីរយប់ នៅឯមូលដ្ឋានមួយ ដែលពួកគេត្រូវបានប្រគល់កាំភ្លើង និងឯកសណ្ឋានសម័យសូវៀតឱ្យ។ បន្ទាប់ពីនោះ ពួកគេត្រូវបានគេប្រាប់ថា ពួកគេកំពុងត្រូវបានដាក់ពង្រាយទៅកាន់ទីក្រុង អាទីមូវ ដែលជាកន្លែងនៃការប្រយុទ្ធគ្នាជាច្រើនខែ រវាងកងកម្លាំងរុស្ស៊ី និងអ៊ុយក្រែន ដែលត្រូវបានពិពណ៌នាថាជា “ម៉ាស៊ីនកិនសាច់” និងការប្រយុទ្ធដ៏ធំបំផុតនៃសតវត្សទី ២១ រហូតមកដល់ពេលនេះ។
ទាហានខ្លះចង់ចុះហត្ថលេខាលើការបដិសេធជាផ្លូវការ ក្នុងការធ្វើតាមការបញ្ជាដោយនិយាយថា ពួកគេមិនមានការបណ្តុះបណ្តាលត្រឹមត្រូវសម្រាប់កិច្ចការនេះ។ មនុស្សម្នាក់បានត្អូញត្អែរថា គាត់មិនដែលកាន់កាំភ្លើងពីមុនមក ហើយភ័យខ្លាច ប៉ុន្តែមេទ័ពអ៊ុយក្រែនគ្រាន់តែប្រាប់គាត់ថា សមរភូមិ បាក់មុត នឹងបង្រៀនអ្នក៕ ប្រែសម្រួលៈ ណៃ តុលា
