ព័ត៌មានអន្តរជាតិ

អាមេរិក ​ថារុស្ស៊ី​ មិន​អាច​ឈ្នះ​អ៊ុយក្រែន​បាន​ទេ ប៉ុន្ដែទីក្រុង​ម៉ូស្គូ​ឆ្លើយតបថា ​សង្រ្គាម​នៅ អូសបន្លាយយូរទៀត

បរទេស ៖ មន្ត្រីយោធាជាន់ខ្ពស់ របស់សហរដ្ឋអាមេរិក បានឲ្យដឹងថា ប្រទេសរុស្ស៊ី នឹងមិនទទួលបានជ័យជំនះ ផ្នែកយោធានៅអ៊ុយក្រែន នោះទេ ហើយកងកម្លាំងរបស់ទីក្រុងគៀវ ទំនងជាមិនអាចវាយបកឲ្យកងទ័ពរុស្ស៊ី ទាំងអស់ចេញពីទឹកដីរបស់ពួកគេ នៅពេលណាមួយក្នុងពេលឆាប់ៗនេះដែរ។

ឧត្តមសេនីយ Mark Milley ប្រធានអគ្គសេនាធិការ ចម្រុះអាមេរិក បានឲ្យដឹងកាលពីថ្ងៃព្រហស្បតិ៍ “​សង្គ្រាម​នេះ​ជា​ផ្នែក​យោធា​នឹង​មិន​ឈ្នះ​ដោយ​រុស្ស៊ីនោះ​ទេ វាមិនអញ្ចឹងទេ” នេះបើយោងតាមការចុះផ្សាយ របស់ទីភ្នាក់ងារសារព័ត៌មាន Aljazeera។

គោលដៅយុទ្ធសាស្ត្រដើមរបស់រុស្ស៊ី រួមទាំងការផ្តួលរំលំរដ្ឋាភិបាលក្នុងទីក្រុងគៀវ “មិនអាចសម្រេចបាន ដោយយោធានោះទេ” លោក Milley បានប្រាប់អ្នកសារព័ត៌មានបន្ទាប់ពីការបញ្ចប់នៃកិច្ចប្រជុំនិម្មិតនៃប្រទេសរាប់សិប ដែលជាសមាជិក នៃក្រុមទំនាក់ទំនងការពារអ៊ុយក្រែន ដែលត្រូវបានគេស្គាល់ថា ជាក្រុម Ramstein ។

លោក Milley បានលើកឡើងថា មានទាហានរុស្ស៊ីរាប់សែននាក់ នៅក្នុងអ៊ុយក្រែនផងដែរ ដែលនឹងធ្វើឱ្យគោលបំណង របស់ទីក្រុងគៀវ ក្នុងការដណ្តើមយកទឹកដីទាំងអស់ ដែលបានបាត់បង់ទៅឱ្យកង កម្លាំងរបស់ទីក្រុងម៉ូស្គូ ទំនងជាមិនអាចកើតមាន “ក្នុងរយៈពេលដ៏ខ្លី” បានឡើយ។

លោកបានបន្ដថា “នោះមានន័យថា ការប្រយុទ្ធនឹងបន្ត វានឹងបង្ហូរឈាម វានឹងពិបាក។ ហើយ​នៅ​ពេល​ណាមួយ ភាគី​ទាំង​ពីរ​នឹង​ចរចា​រក​ដំណោះស្រាយ នោះ​ពួកគេ​នឹង​ឈាន​ដល់​ការ​សន្និដ្ឋាន​ផ្នែក​យោធា”។

ការវាយតម្លៃរបស់លោក Milley បន្ថែមទៅលើការព្យាករណ៍មួយចំនួន ដែលថាសង្រ្គាមនៅអ៊ុយក្រែន ហាក់ដូចជាអូសបន្លាយ ដោយភាគីទាំងសងខាងមិនមាន ជំហរក្នុងការទទួលជ័យជម្នះ យ៉ាងច្បាស់លាស់ និងគ្មានការចរចា ដែលកំពុងកើតឡើងនៅពេលនេះទេ៕

ប្រែសម្រួល ឈូក បូរ៉ា

To Top