ប៉េកាំង៖ ទីប្រឹក្សារដ្ឋ និងជារដ្ឋមន្ត្រីក្រសួងការពារជាតិចិន លោក Li Shangfu បានឲ្យដឹងថា ប្រទេសចិន និងសហរដ្ឋអាមេរិក គួរតែដោះស្រាយភាពខ្វែងគំនិតគ្នា ការលំបាកដោយក្លាហាន និងស្វែងរកវិធីត្រឹមត្រូវ ដើម្បីចុះសម្រុងគ្នា។
លោក Li បានឲ្យដឹងនៅក្នុងសុន្ទរកថា របស់លោកនៅឯកិច្ចសន្ទនា Shangri-La លើកទី២០ ថា ទំនាក់ទំនងចិន-អាមេរិក គឺស្ថិតនៅលើស្ថិរភាពយុទ្ធសាស្ត្រសកល ហើយជាការផ្តោតការយកចិត្តទុកដាក់ជាសកល នេះបើយោងតាមការចុះផ្សាយរបស់ ទីភ្នាក់ងារសារព័ត៌មានចិនស៊ិនហួ។
នៅក្នុងនោះដែរលោកបានអំពាវនាវឲ្យ ប្រជាជាតិទាំងពីររស់នៅតាមការរំពឹងទុក របស់ប្រទេសក្នុងពិភពលោក ហើយដើរតាមនិន្នាការនៃសម័យកាល ដោយសារតែភាគីទាំងពីរនាពេលបច្ចុប្បន្ននេះ មានការតានតឹងកាន់តែខ្លាំងឡើង។
លោក Li បានលើកឡើងថា សហគមន៍អន្តរជាតិស្វែងរកសន្តិភាព និងស្ថិរភាពទំនាក់ទំនងចិន-អាមេរិក និងព្រួយបារម្ភ អំពីជម្លោះដែលអាចកើតមាន ឬការប្រឈមមុខគ្នា ដែលនឹងក្លាយជាគ្រោះមហន្តរាយ ដែលមិនអាចទ្រាំទ្របាន សម្រាប់ពិភពលោក។
លោកបានបន្តថា ជំនួសឱ្យការបង្កឱ្យមានការប្រឈមមុខដាក់គ្នា ក្នុងប្លុកដើម្បីផលប្រយោជន៍ខ្លួនឯង ប្រទេសធំៗគួរគិតគូរពី ផលប្រយោជន៍ទាំងអស់គ្នា ដោះស្រាយការខ្វែងគំនិតគ្នាតាមរយៈការផ្លាស់ប្តូរ និងកិច្ចសហប្រតិបត្តិការ ។
ទោះបីជាមានប្រព័ន្ធផ្សេងគ្នា និងភាពខុសគ្នាផ្សេងទៀតក៏ដោយ លោកបានកត់សម្គាល់ថា ប្រទេសចិន និងសហរដ្ឋអាមេរិក គួរតែស្វែងរកមូលដ្ឋានរួម និងផលប្រយោជន៍រួម ដើម្បីពង្រីកទំនាក់ទំនងទ្វេភាគី និងធ្វើឱ្យកិច្ចសហប្រតិបត្តិការកាន់តែស៊ីជម្រៅ ព្រោះប្រវត្តិសាស្ត្របានបង្ហាញឱ្យឃើញថា ប្រទេសទាំងពីរនឹងទទួលបាន ផលប្រយោជន៍ពីកិច្ចសហប្រតិបត្តិការ និងចាញ់ពីការប្រឈមមុខដាក់គ្នា។
ដោយកត់សម្គាល់ថា ប្រទេសចិន ស្វែងរកការអភិវឌ្ឍប្រភេទថ្មី នៃទំនាក់ទំនងប្រទេសធំ ជាមួយសហរដ្ឋអាមេរិក លោក Li បានអំពាវនាវឱ្យភាគីសហរដ្ឋអាមេរិក ធ្វើសកម្មភាពដោយស្មោះត្រង់ ផ្គូផ្គងពាក្យសម្ដីរបស់ខ្លួន ជាមួយនឹងទង្វើ និងចាត់វិធានការជាក់ស្តែង ដើម្បីធ្វើការរួមគ្នាជាមួយប្រទេសចិ នក្នុងទិសដៅតែមួយ ដើម្បីរក្សាស្ថិរភាពទំនាក់ទំនង ចិន-អាមេរិក ពីការខ្សោះជីវជាតិកាន់តែខ្លាំងឡើង។
លោក Li បានទទួលស្គាល់ថា ប៉ុន្មានឆ្នាំកន្លងមកនេះបានឃើញថា ទំនាក់ទំនងចិន-អាមេរិក ស្ថិតក្នុងកម្រិតទាបបំផុតចាប់តាំងពី ការបង្កើតទំនាក់ទំនងការទូតមក ប៉ុន្តែគេជឿថា “ពិភពលោក គឺធំល្មមសម្រាប់ប្រទេសនានា រួមទាំងចិន និងសហរដ្ឋអាមេរិក ដើម្បីរីកចម្រើនជាមួយគ្នា”៕
ប្រែសម្រួល ឈូក បូរ៉ា
![](https://dap-news.com/wp-content/uploads/2020/08/1-1.png)